Inviterer til 50-årsfest for kraftanlegg
Statkraft inviterer til open dag i Austrepollen, og feirar fem tiår med kraftproduksjon i Folgefonn-anlegga.
13. juni feirar Folgefonn-anlegga 50-årsjubileum ved administrasjonsbygget til Statkraft i Austrepollen. Regiondirektør Svein Ilstad og kraftverkssjef Vidar Riber i Statkraft ser fram til ein open dag med kulturelle innslag, mat- og kakeservering og boklansering.
– Folgefonnutbygginga var eit pionerprosjekt. For fyrste gong vart det planlagt og bygt eit kraftverk som henta vatn frå ei isbre, seier regiondirektør Svein Ilstad i Statkraft i ei pressemelding.
Statkraft påpeikar at sidan 1974 har kraftverka bidrege med 65 terawattimar (TWh) med fornybar energi, i tillegg til inntekter til vertskommunane.
– Mauranger er kjent som Noregs første kraftverk som henta inn smeltevatn frå under ein isbre. No gler me oss til å feira 50 år med kraftproduksjon ved Mauranger og Jukla kraftverk saman med lokalbefolkninga, seier kraftverkssjef Vidar Riber i presseskrivet.
Fjerde største
Statkraft er i full gang med å planleggja for framtida med Mauranger 2, noko føretaket nytta høvet til å informera om då energi- og miljøkomiteen vitja kraftstasjonen i Austrepollen i mai.
– Mauranger 2 er eit heilt nytt kraftverk ved sida av det gamle som, om det blir bygt, vil bidra med både kraft og effekt i ein region med stor etterspurnad etter fornybar energi. Mauranger 2 vil kunna bli Noregs tredje største kraftverk målt i installert effekt, og bidra med regulerbar kraft som kraftsystemet vårt er avhengig av når sola ikkje skin og vinden ikkje blæs, seier regiondirektør Ilstad i pressemeldinga.
Lanserer bok
Som del av feiringa vil boka «Det kvite gullet» av forfattar Sigurd Vikøren verta lansert. Boka har ifylgje Statkraft informasjon, intervju og bilete frå Mauranger og tida før, under og etter anlegget vart bygt. Ho gir eit historisk tilbakeblikk på eit samfunn før kraftverket kom til, menneska som var der og dei fem tiåra sidan, seier Statkraft om boka.
«Det kvite gullet» handlar også om nokre mørke kapittel, som snøskredet i Rennedalen under bygginga av Mauranger kraftverk i 1970. Sju mista livet.
