Interesseorganisasjon vil ha driveplikt i utmark

Grunneigarar av utmark bør påleggjast driveplikt for å sikre bruk av beiteressursar, meiner leiar for utmarksrådet i interesseorganisasjonen Norsk Sau og Geit (NSG).

Utmarksbeite er ein berekraftig måte å auke matproduksjonen på. Ei lovpålagd driveplikt kan sikre at utmarka blir utnytta fullt ut, skriv leiar Ketil Trongmo i utmarksrådet i NSG i ein kronikk hos Nationen.

– Som leiar av utmarksrådet er eg engasjert i spørsmål om berekraftig bruk av norske utmarksressursar. Eit tiltak eg personleg meiner vil vere avgjerande for å sikre ein slik bruk, er å påleggje eigarar av utmark ei bruks/driveplikt, skriv han.

Forslaget har som mål å sikre at utmarka blir brukt på ein måte som både er økonomisk lønnsam og økologisk berekraftig.

– Ei slik lov kan også bidra til å redusere konfliktnivået knytt til bruk av utmarka, som eg opplever er aukande, meiner utmarksleiaren.

(©NPK)