Inspiserte kraftverk
Det står att noko arbeid med arrondering og støydemping ved Brattabøelvi kraftverk i Jondal.
Det går fram av eit brev frå Noregs vassdrags- og energidirektorat (NVE) til Blåfall Utvikling AS etter ein inspeksjon av kraftverket 5. oktober. Inspeksjonen vart gjennomført i den avsluttande byggjefasen.
Det står att noko arbeid med tilbakeføring og sluttarrondering, konstaterer NVE. Direktoratet hadde ingen merknader til arbeidet med dam og inntak. Når det gjeld vassvegen, står det att noko arbeid med arrondering og sikring av elvekantar. NVE ber verksemda ha eit særleg fokus på avslutninga.
Når det gjeld kraftstasjonen og eit uteareal, ber NVE verksemda om å setja i verk støydempande tiltak mot generatorlyd. NVE vil ved seinare tilsyn be om dokumentasjon knytt til støy.
Brattabøelvi kraftverk er eit elvekraftverk som utnyttar eit fall på 239 meter i elva med ein peltonturbin. Installert effekt er 4,4 megawatt. Det opplyser Energi Teknikk AS på heimesida. Verksemda har levert den elektromekaniske utrustinga til kraftverka i Brattabøelvi og Krossdalselvi.
