Innstiller fleire avgangar
Også i kveld og fredag morgon vert til saman ti ferjeavgangar innstilte. Fyrst laurdag er det venta normal drift.
Det melde Fjord1 AS på vegner av Skyss torsdag ettermiddag. Det vert sett inn passasjerbåt på dei råka avgangane.
I kveld vert avgangane klokka 21.30, 22.00. 22.30 og 23.00 innstilte. I morgon tidleg vert avgangane klokka 05.20, 05.50, 06.20, 06.50, 07.20 og 07.50 innstilte.
Dei same avgangane vart råka i går kveld og i dag tidleg.
Operasjonelle årsaker er forklaringa frå Fjord1 på alle innstillingane. Ifylgje regiondirektør Tor Kristoffersen er sjukdom grunnen. Han opplyser at Fjord1 reknar med at ferja går som normalt fyrst laurdag morgon klokka 08.20.
Fylkestingsrepresentant og jondøling Sigrid Brattabø Handegard (Sp) har teke opp ferjeproblema i eit spørsmål til møtet i fylkesutvalet 23. januar. Ho meiner det ikkje held med passasjerbåt i staden for ferje, ettersom mange treng bil for å koma seg vidare.
Handegard, som omtalar «innstilt av operasjonelle årsaker» som nyord i 2024, ynskjer å vita om manglande leveranse frå operatøren er vurdert i samband med eventuell bruk av opsjonen på å lengja anbodet til 2030. Då skal nye ferjekontraktar for 18 samband tre i kraft.
– Vil det vera mogeleg å lysa ut anbod på enkelte ferjestrekningar, som har dårleg leveranse, tidlegare? spør ho.
