Innsats for små heltar
Ei gruppe elevar på Strandebarm skule inviterer til halloweenfest for dei yngre for å samla inn pengar til årets tv-aksjon.
Halloweenfesten vert arrangert i kantina 31. oktober for 1.–4. klasse. Før arrangementet har elevane, som har valfaget «innsats for andre», samla inn pant på strekninga frå Tørvikbygd til Mundheim for å kunna stella det heile i stand. Mange har bidrege, fortel Ragnhild Skår, faglærar på Strandebarm skule.
På festen, som er gratis, skal deltakarane få vera med på leikar, og det vert høve til å kjøpa enkel mat. Alt overskotet skal gå til dei små heltane, som innsamlingsaksjonen er laga til for, seier Skår.
«Saman for små heltar» er slagordet til årets tv-aksjon, som går til Barnekreftforeningen.
Torsdag ettermiddag heldt elevane på med førebuingar. Det er så kjekt og elevane er så positive, seier læraren. Lokalet skal pyntast med sjølvlaga halloweenpynt. Pølsefingrar vert serverte til dei som torer, og føresette skal få servert skummel, svart kaffi, for å nemna noko.
