Innsats for seg sjølv og andre

Sponsorløpet har vore arrangert fleire gongar. Ei gruppe elevar med «Innsats for andre» som valfag står bak organiseringa.

Føremålet er å samla inn pengar, men også å gjera noko annleis, fortel Charlotte Sandvik. Ho er miljørettleiar på skulen og ansvarleg for elevane som har valfaget, og er lærarkontakt for elevrådet.

I fjor var det berre 8. og 9. klasse som sprang for å samla pengar. Då kom det inn vel 85.000 kroner. Den gongen gjekk pengane til Barnekreftforeningen. I år er også 10.-klassingane med på løpet, fortel Sandvik. Det er kjekt at alle får gjera noko kjekt saman, synest ho.

Ynskjer fleire «ting»

«Innsats for andre» har ein eigen PR-ansvarleg. Elev Vetle Steine Neteland fekk jobben.

Under sponsorløpet hadde han som oppgåve å dela ut saft til dei som sprang forbi. Safta var populær. Å hella saft frå stor plastdunk i små plastglas i høgt tempo kan vera utfordrande nok. Svinn vart heldigvis ikkje registrert.

Neteland synest det verka som at elevane gjorde ein god innsats.

– Kor mykje tippar du at de samlar inn?

– I fjor var det vel over 80.000 kroner. Me går for det same no.

– De spring vel fleire i år?

– Ja, 10. klasse òg. Om alle har sponsorar, får me nok inn ein god sum, seier Neteland.

– Kva håpar du pengane vert brukte til på skulen?

– Vedlikehald og fleire «ting» på skulen, seier Neteland.

Løypa er kring éin kilometer lang, og elevane måtte springa minst to rundar. Dei tre som sprang flest rundar, fekk premie. Elevar som ikkje ville springa, kunne gå eller vera med og heia.

Løparane fekk éin time på seg til å fullføra så mange rundar dei makta. I fjor sprang dei ivrigaste 13 rundar. Då HF drog frå staden etter ei stund, var det framleis mange att i løypa.

Svoltne på frukost

Av pengane som vert samla inn, går halvparten til Redd Barna. Resten går til lokale tiltak på skulen, står det i infoskrivet til foreldra. Konstituert rektor Frode Sandven opplyser at det er elevrådet som styrer med dei lokale tiltaka det er snakk om.

– Kva går pengane til?

– Både til aktivitetar og til utstyr knytte til aktivitetar. Me kjøper inn ein del på skulen, men så er det jo ein fordel om dei kan spytta inn litt sjølve òg, seier rektoren.

Inntektene til elevrådet er i hovudsak knytte til kantinedrift, opplyser han.

Charlotte Sandvik seier at elevane ynskjer å ha skulefrukost to dagar i veka. Det er noko elevrådet arbeider med allereie, fortel ho.

Planen er at pengar som kjem inn frå løpet, kan brukast til skulefrukost, og at det etterpå vert enklare å få stønad til eit skulefrukostprosjekt om ein har ein rapport å visa til. Det er snakk om å fylgja modellen som har vore på Kvam vidaregåande skule i Øystese, opplyser Sandvik. Der har elevane fått havregraut og ulike frukostblandingar dei kan forsyna seg av på morgonen.

Sjå fleire bilete her:

Initiativ frå elevane

Å gå på skule i Noreg skal ikkje kosta foreldre noko, men det er ikkje ulovleg å samla inn pengar til aktivitetar eller turar. Rektor Sandven seier at løpet er eit initiativ som har kome frå elevane og elevrådskontaktane, og opplyser at pengane frå sponsorløpet ikkje er knytte til undervisningsaktivitetar eller undervisningsutstyr. Det er knytt opp til friminutta.

– Skulen kjøper inn ein del utstyr til bruk i friminutta, men det er eit ynske om å finna på endå meir, seier Sandven.

Skulen har likevel eit ansvar for at foreldreinnsamlinga går føre seg på lovleg måte, og bidraga skal ifylgje Utdanningsdirektoratet vera frivillige og anonyme. Det skal ikkje vera synleg kven som ikkje yter noko.