Innsamlingsrekord på Framnes
250 elevar og 3 lærarar ved Framnes Kristne Vidaregåande Skule sprang inn 1,1 millionar kroner under det årlege misjonsløpet på skulen.
Løpet vart skipa til laurdag 29. oktober. Det opplyser leiar for årets misjonsprosjekt ved Framnes, Eline Hellesøy.
Ho og medleiar Sara Nilsen kan konstatera at summen er ny rekord. Pengane går til Youth With A Mission Medical Ships Papua New Guinea.
Elevane sprang så mange rundar på 500 meter dei klara på 90 minutt – i gjennomsnitt 23,5 rundar kvar.
– Det var veldig bra. Eg hadde ikkje rekna med eit så høgt gjennomsnitt, så det var kjekt, seier Hellesøy.
Lengst sprang Emanuels Zaurins: 41 rundar.
Sponsa av kjenningar
Vekene før løpet spurde elevane familie og kjenningar om dei ville sponsa løpet med ein fast sum eller ein sum for kvar runde. Elevane hadde også motiverande sponsorkveldar. Ein del bibelskular og folkehøgskular i landet har vore med og sponsa og vorte reklamerte for i løpet.
Løpet er den absolutt største inntektskjelda for misjonsprosjektet. Hellesøy reknar med at det vil koma inn nokre hundre tusen i tillegg gjennom skuleåret, gjennom andre aktivitetar. Desse er til dømes basar, måneskinstur og kiosk.
Heile skulen er med på prosjektet, men det er elevane i 3. klasse som vel kven ein skal støtta. Det er eit nytt prosjekt kvart år.
YWAM Medical Ships går rundt kysten av Papua New Guinea og sender inn patruljebåtar med hjelp til isolerte landsbyar. Mesteparten av øya manglar grunnleggjande infrastruktur og har liten tilgang til legehjelp.
Statsministeren i øystaten nemnde i ein nyttårstale sjukehusskipet som ein viktig ressurs for landet.
Vil sjå sjølve
Hellesøy og Nilsen dreg truleg til Papua New Guinea i månadsskiftet januar–februar for å sjå ved sjølvsyn kva pengane vert brukte til. Dei reiser i lag med dei som er i spissen for YWAM Medical Ships i Noreg. Også undervisningsinspektør Jostein Moldsvor vert med.
– Kva er bakgrunnen for at de engasjerer dykk i misjon?
– Me er takknemlege for at me kan ha fokus på noko som er større enn oss sjølve, noko me kan bruka tida og ressursane våre på, og nokon som treng det meir enn me. Eg er personleg kristen, og det er fint å kunna bruka tredjeåret på helsehjelp og evangelisering på Papua New Guinea, seier Hellesøy.
