Innleier Ukraina-samarbeid
Hardangerrådet og HMM Helsehjelp til Ukraina (HMM) har signert ein samarbeidsavtale.
Dette kjem fram i ei pressemelding frå Hardangerrådet. Avtalen vart signert av rådsordsførar Roald Aga Haug og direktør Jon Wigum Dahl ved avdeling for internasjonalt samarbeid på Haukeland universitetssjukehus då Hardangerrådet hadde møte i Norheimsund torsdag 19. januar.
HMM er eit samarbeid mellom Haukeland universitetssjukehus, Tor Fredrik Müller og Paal Christian Mowinckel.
Avtalen gjer at hardangerkommunane skal kanalisera bidraga til Ukraina gjennom HMM. Haukeland universitetssjukehus koordinerer arbeidet og har ansvaret for økonomien.
Ifølgje nettsida til HMM har arbeidet deira ført til at utstyr verdt fleire titals millionar kroner er sendt til Ukraina. I 2022 vart 14 varebilar og trailerar sende frå Bergen fullasta med utstyr, klede, stridsrasjonar og straumaggregat. Mykje av utstyret er gåver frå avdelingar på Haukeland universitetssjukehus og andre helseaktørar på Vestlandet. Resten er kjøpt med innsamla pengar.
