Inngår avtale om båtverkstad

Båtverkstaden i Holmsund i Norheimsund skal restaurerast, og Kvam herad og Nedre Valland og Nes grendelag har inngått ein avtale om samarbeid.Bygningsvernkonsulenten ved Hardanger og Voss museum vil vera rådgjevar, og arbeidet skal gjerast etter antikvariske prinsipp. Arbeidet startar i vinter og vil verta utført etappevis etter kvart som det kjem inn pengar. Kvam herad vert byggherre, gjer avtale med byggmeister og følgjer opp det praktiske arbeidet. Heradet skal syta for at alle husa i Holmsund får rett status i planane, og står for søknadsarbeid i dei høve der heradet må stå som søkjar. Nedre Valland og Nes grendelag står for søknadsskriving og finansieringsarbeid i samråd med heradet og museet.Kvam herad opprettar ein prosjektkonto for restaureringa. Tilskot som grendelaget mottek, vert øyremerkt til restaurering av båtverkstaden og overført til denne kontoen. Heradet har ansvar for økonomistyringa. Prosjektet skal ikkje råka grendelaget sin økonomi. Kvam herad vil ha ansvaret for vedlikehaldet av båtverkstaden, på same vis som heradet har for dei andre husa i Holmsund. Nedre Valland og Nes grendelag vil bidra med dugnad når det er folk i grenda som vil bruka tid på dette, heiter det i avtalen, som er underskriven av Stein Rykkje for Kvam herad og Eva Cecilie Holm i grendelaget.