Ingen suksess for unge hardingar
Deltakinga på arrangementa til prosjektet «Unge hardingar» minka markant frå 2023 til 2024.
Så laber interesse var det for arrangementa at styret i næringsrådet i september bestemte seg for å avslutta prosjektet. Det melder Kvam Næringsråd i ein sluttrapport til Kvam herad.
I tillegg har det vore vanskeleg å få nye personar inn i prosjektgruppa, som har opplevd fleire fråfall sidan ho vart etablert i juni 2023.
I 2023 samla dei 4 arrangementa frå 4 til 38 deltakarar, og totalt 71 deltakarar. I fjor kom til saman 4 personar på 3 arrangement. 2 kom for å høyra om gjenbruk, medan ingen ville læra om «sidereventyret» på fyrste forsøk. På andre forsøk kom 1 person.
Kvam herad har støtta prosjektet, som fyrst heitte «Kvam U40», med i alt 90.000 kroner frå kraftfondet. Målet med initiativet var å skapa eit miljø for arbeidstakarar under 40 år som lett kan koma til å flytta vidare om dei ikkje finn eit nettverk i Kvam.
Utgiftene i 2024 har vore på 61.915 kroner. Av denne summen har 29.250 kroner gått med til 58,5 timar med «administrasjon» til ein pris på 500 kroner timen. Også møta i prosjektgruppa har kosta 500 kroner timen, og til saman 12.250 kroner.
