Ingen skadd i internatbrann på Framnes
Ein brann på eit internatkjøken på Framnes Kristne Vidaregåande Skule i Vikøy førte til stor utrykking laurdag morgon.
Den første meldinga om brannen kom om lag klokka 08.30. Både Kvam brann og redning, politiet og helsetenesta rykte ut. Klokka 09.08 melde 110 Vest at brannen var sløkt.
Ingen var der
Brannen oppstod i ei av tre avdelingar i eit av internatbygga, Framheim. I kvar avdeling finst soverom, vaskerom og felles stove og kjøken.
Ingen var i bygget då alarmen gjekk. Det oppstod mykje røyk, og brannalarmen vart utløyst. Gjenstandar, mellom anna tekstilar, i nærleiken av ein komfyr på kjøkenet byrja brenna, fortel politioverbetjent Ann-May Garen ved Kvam politistasjon. Det vart tinga såkalla restverdisikring etter brannen, opplyser ho.
Ifylgje Odd Inge Austevoll, som er eigedomsutviklar på skulen, vart brannen sløkt i samarbeid mellom han og to andre allereie før brannvesenet kom fram. Dei tre fekk kopla ut kraftforsyninga og slo ned flammane med hjelp av brannslange, alt i tråd med vanlege brannrutinar på skulen, fortel Austevoll til HF.
Dei som hadde vore i internatbygget under brannen før brann- og redningstenesta kom, fekk ein helsesjekk og vart erklært uskadde.
Brannårsaka er ukjend. Brannen vert etterforska av politiet, fortel Garen.
Gjekk sin gang
Framnes Kristne Vidaregåande Skule hyser laurdag til tysdag ein stor konfirmasjonsleir i regi av Krik - Kristen idrettskontakt. Kring 350 elevar var venta til skulen laurdag ettermiddag.
Kring 160 av dei om lag 190 leiarane på leiren overnatta på skulen natt til laurdag. Ingen av desse var i internatbygget då det byrja brenna, ettersom dei var samla til frukost, men ti personar sov i bygget natta før brannen, opplyser leir- og leiarutviklingsansvarleg i Krik og beredskapsansvarleg for leiren i Kvam, Andreas Holøs.
Han fortel at han gjekk opp mot internatbygget etter at han vart merksam på brannalarmen. På veg dit møtte han fleire som fortalde at det faktisk brann og at det kom røyk ut or bygget. Han var sjølv vitne til at brannen raskt kom under kontroll.
Holøs opplyser at arrangørane snøgt fekk samla alle leirleiarane på avtala stad og talt dei opp. Han rekna laurdag med at leiren ville gå sin gang, truleg med nokre endringar i overnattingskabalen ut frå råd frå brannvesenet.
Ingen av konfirmantane skulle sova i Framheim. Dei fleste av dei overnattar i klasserom i hovudbygget, fortel Holøs, som forsikrar om at leiren har gode rutinar for branntryggleik og døgnbemanning.
