– Ingen samlingsplass for born og unge

Det spørsmålet må heradsstyret svara på 1. februar. Verksemda har søkt om løyve til å skjenkja øl, vin og brennevin i den nye sushirestauranten Uni Izakaya ved torget. Kafé Hjørnet heldt til i lokala før.

Rådmannen ser ikkje nokon grunn til å nekta verksemda løyvet, som skal omfatta 70 rutemeter inne og eit avgrensa, kommunalt eigt område utandørs på 46 rutemeter. Den tilrådde skjenkjetida er frå klokka 12 til 02 for øl og vin, og frå 13 til 00.30 for brennevin.

Restauranten skal tilby lokalt kjøt, sushi og annan mat med inspirasjon frå Japan. Planen er å halda kjøkenet ope frå lunsj til klokka 21. I helgane er planen å skjenkja alkohol til klokka 00.30. Naboen pub får med andre ord ein ny konkurrent eit kort steinkast frå seg.

Kvam herad er ein såkalla Av-og-til-kommune. Rådmannen hevdar at skjenkjeløyvet ikkje vil koma i konflikt med prinsippa som ligg til grunn for deltakinga, og meiner torget ikkje er eit naturleg samlingspunkt for born og unge. Det er ein busshaldeplass i nærleiken, men ikkje leikeplass, badeplass, idrettsplass, fotballbane eller liknande, skriv ho i saksutgreiinga.

Formannskapet drøftar saka 25. januar. Heradsstyret avgjer 1. februar.

Den nye restauranten opna 24. januar.