To nye smitta i Kvam
150 var testa i Kvam til og med onsdag. To nye smitta, i alt sju, er avdekte.
Måndag auka talet på smitta frå fire til fem, før det altså auka med to torsdag. Det opplyser Kvam herad. 12 tilsette i pleie og omsorg var i karantene torsdag.
Artikkelen held fram under annonsen.
I Ullensvang er ingen påvist smitta enno. 100 var testa onsdag.
Ordførar Roald Aga Haug (Ap) oppmodar folk om å feira 17. mai i familien i år. Ingen store tilstellingar er aktuelle med restriksjonane frå styresmaktene, meiner han.
Debatten om bruk av campingplassar har halde fram denne veka. Medan det er forbode å overnatta i hytter utanfor heimkommunen, har ikkje regjeringa forbode overnatting på campingplassar. Uturvande reising er frårådd.
Ordførar Torgeir Næss (Ap) i Kvam varslar ei snarleg kunngjering om temaet. I Kvam er, etter det han veit, campingplassane stengde av eigarane. I Odda er bubilplassen på Almerket fysisk stengd. Voss kommune har stengt mellom anna campingplassane med heimel i smittevernlova.
