Ingen løyndom kven dei fleste stemte på
Fredag 1. september vart det halde skuleval ved Framnes Kristne Vidaregåande Skule. Måndag er det Kvam vidaregåande skule sin tur. Tysdag er resultatet klart.
Elevane Celina Toppe, Miriam Flataker og Kaja Neteland var mellom elevane som røysta i skulevalet denne fredagen.
For veninnene er det viktig å bevara den kristne ungdomskulturen og ha eit kristent miljø. Dei ynskjer at fleire born skal få oppleva at det er kjekt å gå på kristne skular, og at trua vert sterkare. Det er viktig for dei som går på Framnes, fortel jentene.
Den kristne vidaregåande skulen hadde besøk av politikarar torsdag 31. august. Det var spanande, synest jentene. Etter debatten ville alle tre stemma på KrF.
– Dei andre hadde forskjellige meiningar som eg ikkje var heilt einig i, seier Toppe.
– Negativ venstreside
I debatten torsdag tykte elev Vegard Eikhaug at det var interessant å høyra kva andre på hans alder meinte. Då HF var innom fredag, var han og Håvard Lade ute for å stå på rulleski.
– Var det nokon politikarar som utmerkte seg?
– Eg synest KrF hadde mykje positivt å koma med, utan tvil. Framnes er ein kristen friskule, og ein merkar at KrF er eit parti som kjempar for oss. Så har du parti på venstresida som etter mi meining er litt meir negative, seier Eikhaug.
– Gjeld det i Kvam òg?
– Det verka slik etter debatten.
Irritert på gamle politikarar
Kristoffer Bjørnevik Vyzantios går i tredje klasse på Framnes. Han meiner det viktigaste temaet i valkampen er klima og miljø.
– For meg er det viktig at eg og borna mine skal ha ei framtid. Difor er det viktig for meg at politikarane tek den saka seriøst.
– Kva er du villig til å gjera sjølv for å berga klimaet?
– Fly mindre, køyra mindre, bruka færre eingongsprodukt og gjenbruk. Det føler eg at eg er ganske god til.
Vizantios har vore engasjert i miljøet så lenge han kan hugsa. Han har alltid tenkt at det er ei viktig sak, og vert irritert når gamle politikarar står og seier at det ikkje er så viktig.
– Vil du kjøpa deg fossilbil eller elbil?
– Når eg får pengar til å kjøpa meg bil, så trur eg nok eg kjem til å kjøpa meg ein elbil.
– Noko spesielt merke?
– Polestar, dei synest eg er kule, seier Vyzantios.
