Ingen knaskar salat frå Fykse
Fykse Gartneri har vore råka av sviktande og varierande sal sidan koronapandemien starta.
Gartneriet på Fykse leverer crispisalat til Horeca-bransjen — hotell, restaurant og keitering. Når desse har stengt ned, har dagleg leiar Alf Olav Fykse ikkje fått levert alt han produserer. Verksemda har difor søkt den kommunale kompensasjonsordninga om 252.000 kroner.
Bestillingstala frå Bama Gruppen AS syner at den førre eigaren av gartneriet leverte 266.000 salatar i 2019, det siste heile året før pandemien. I 2021 leverte Fykse 228.000 salatar. Det er ein nedgang på 14 prosent for eit produkt som er føresagt aukande vekst.
I 2020, året då Fykse overtok drifta, var salet endå dårlegare.
Gartneriet vart i haust råka av høge straumprisar, men var budd på å produsera gjennom vinteren med noko tap for å halda på kundane. Men då salet stoppa opp på grunn av ein ny runde med smitteverntiltak, var det ikkje råd å halda fram drifta.
— Me stengde produksjonen i desember 2021, og har ikkje folk i arbeid lenger, skriv Fykse i søknaden.
