Ingen avbestillingar – enno

Europeiske alpinistar kjem til Folgefonna for å trena i sommarsnøen. Vil dei kunna det i år?

Om sommaren vert Folgefonn Gjestetun i Jondal fylt opp av alpinistar frå både inn- og utland, som nyttar skianlegget på Folgefonna til å trena.

Gjestetunet husar dessutan deltakarane i What! Summer Camp i to veker i slutten av juni.

Dørene opnar ikkje før i månadsskiftet mai/juni, og førebels har ein ikkje vorte påverka av koronaviruset. Bestillingane er gode gjennom sommaren, og avbestillingane har ikkje byrja å komma enno, seier dagleg leiar Helge Arne Espeland.

Mange europearar

– Det er for tidleg til å sjå totaleffekten, men me ser at det kan komma utfordringar. Den største delen av omsetninga vår er basert på aktiviteten på skisenteret. Eventuelle restriksjonar vil påverka oss i sommar og haust, seier han.

Espeland har ikkje tru på at situasjonen vil normalisera seg til i sommar. I dag er skianlegg stengde, fritidsreiser vert frårådde og alle som reiser til Noreg frå utlandet, må i karantene i 14 dagar.

Europeiske landslag kjem til Folgefonna for å trena i den norske sommarsnøen. Espeland anslår at inntil 30 prosent av sommargjestene på gjestetunet kjem frå utlandet. I juli kan talet vera opp mot 60 prosent.

Nok eit dårleg år?

– Me har lagt to dårlege år bak oss. Me håpa på at det skulle verta eit godt år i år – og snøtilhøva ligg til rette for det –, men situasjonen no tilseier at det kjem til å verta eit utfordrande år. Men så langt kan me berre spekulera, seier han.

What! Summer Camp skriv på nettsida si at ein framleis planlegg å gjennomføra leirvekene, men at ein tek høgd for å måtta avlysa dersom det vert naudsynt. Signala frå leiren er at det ikkje er komme mange avbestillingar, seier Espeland.