Inga god helg for elg
Elg i fjella i Kvam er eit sjeldan syn. Fredag måtte ein bøta med livet.
Då Frank R. Ystebø var på veg opp til hytta ved Karaldenuten i Ålvik fredag, møtte han for fyrste gong på elg i området. Møtet hadde diverre ingen lukkeleg slutt. Ystebø oppdaga at elgen var hardt skadd.
– Den eine framfoten var knekt oppe ved bogen, og han kom seg ingen veg. Han reiste seg då me kom, men gjekk over ende att, fortel han.
– Litt spesielt
Dyret låg i ei steinur i nærleiken av Kaldakjelen i Ålvik. Ystebø trur at elgen var kring halvtanna år gamal.
Ystebø fortel at det ikkje var anna råd enn å avliva elgen når han hadde ein så omfattande skade.
– Det er jo litt spesielt å måtta ta livet av ein elg når ein fyrst møter på ein, seier han.
Ystebø legg til at han har vore i kontakt med nokon som meiner dei såg elg i Fykse-området i helga.
Ti år sidan
Ifylgje nettstaden artsobservasjoner.no, der ein kan registrera funn av planter og dyr i Noreg, er det ti år sidan det sist var registrert ein elgobservasjon i Kvam. Då skal det ha vore elg ved Nernesvegen i nærleiken av Mundheim.
Andre observasjonar i Kvam er gjorde ved Vikøy i 1999, ved Skrott, Melstveit, Berge og Botnadalen i 1998, og ved Steinsdalen i 1996. I Jondal er det registrert observasjonar i 1996 og 2006.
Det er langt meir vanleg å møta på elg i fjellområda på Voss og i Eidfjord enn i Kvam, kjem det fram på nettsida.
