Lettar tiltaka
Måndag går Kvam frå «særleg høgt» til «ganske høgt» tiltaksnivå, men Kvam herad innfører lokale tiltak.
Saka er oppdatert med kommunale tiltak.
Regjeringa tek Kvam herad frå det strengaste tiltaksnivået (nivå A) til nivå C frå og med kommande måndag. Det kunngjorde helseminister Bent Høie (H) på ein pressekonferanse fredag ettermiddag. Dette er i samsvar med ønsket til ønsket til Kvam herad.
Artikkelen held fram under annonsen.
Ordførar Torgeir Næss varslar samstundes at Kvam herad innfører ei lokal forskrift som er strengare enn tiltaka regjeringa legg opp til.
Heradet vil framleis halda skular, barnehagar og kulturskule på raudt nivå, og vil ikkje tillata fritidsaktivitetar for born og unge. Biblioteka vil også halda stengt.
– Me vil ha større fleksibilitet. Situasjonen endrar seg frå time til time. Viss me får kontroll med smittespreiinga, kan me opna opp til nivået regjeringa legg opp til, seier Næss.
Butikkar og restaurantar kan opna
Endringane i Kvam gjeld frå kommande måndag til neste måndag. Dei inneber mellom anna (sjå alle tiltaka i faktaboks lenger nede):
• Enkeltståande butikkar kan opna. Kjøpesenter og varehus skal halda stengt, med nokre unntak.
• Serveringsstader kan vera opne, men det er ikkje lov å skjenka alkohol.
• Det vert anbefalt å avgrensa sosial kontakt og ikkje ha besøk av fleire enn fem gjester i tillegg til dei som bur saman. Born i barnehage og barneskule kan ha besøk frå eigen kohort.
• Vidaregåande skule kan ha fysisk undervising på raudt nivå.
Artikkelen held fram under annonsen.
Heimekontor og heimetrening held fram
Desse reglane held fram:
• Alle bør unngå uturvande reiser.
• Ein har plikt til å bruka munnbind i situasjonar der det ikkje er mogleg å halda éin meters avstand, til dømes i butikkar, i taxi, på kollektivtransport og på serveringsstader.
• Treningssenter, museum og kinoar må halda stengt.
• Det er framleis påbod om heimekontor for alle som kan.
• Arrangement utanfor heimen er framleis forbodne, inne og ute – med unntak av gravferder.
Det vil verta gjort ei ny vurdering innan fredag 19. februar.
Desse tiltaka gjeld i Kvam
Barnehagar og skular
Kvam herad held på raudt nivå for barnehagar og skular. Når dei lokale reglane vert oppheva, vil dei gå over til gult nivå.
Vaksenopplæringa heldt fram på raudt nivå.
Arrangement
Alle arrangement utanfor heimen er forbodne, både innandørs og utandørs, med unntak for gravferder.
Maksimalt fem personar kan vera fysisk til stades på digitale arrangement, i tillegg til naudsynt produksjonspersonell.
Idretts- og fritidsaktivitetar
I Kvam herad vil idrettshallane, symjehallar og øvrige lokale for tilsvarande aktivitetar vera stengde etter ei lokal forskrift. Øvingar og organiserte idretts-, kultur- og andre fritidsaktivitetar vil heller ikkje vera tillatne etter den lokale forskrifta.
Når desse reglane vert oppheva, seier tiltaksnivå C at det vert opna for at born og unge under 20 år kan driva organiserte idretts- og fritidsaktivitetar, medan breiddeidrett og organiserte idrett- og fritidsaktivitet for vaksne ikkje er tillatne.
Arbeidsplassar
Det er framleis påbod om heimekontor for alle som kan. Arbeidsgjevarar skal syta for at tilsette jobbar heimefrå så langt det er praktisk mogleg.
Butikkar
Enkeltståande butikkar kan vera opne. Kjøpesenter og varehus skal framleis halda stengt, men med desse unntaka:
• matbutikkar, inkludert kioskar, helsekost og andre som i hovudsak sel matvarer
• utsalsstader som i hovudsak sel dyrefôr og andre naudsynte artiklar til kjæle- og husdyr
• apotek
• bandasjistar
• optikarar
• serveringsstader
• Vinmonopolet
• verksemder som frisør, hudpleiar, tatovørar o.s.v. (sjå § 15 for heile lista)
• helsefaglege verksemder, som fysioterapeutar, kiropraktorar, fotterapeutar o.s.v. (sjå §16 for heile lista)
• bensinstasjonar
• salsverksemd til landbruk og dyreproduksjon
• lager- og grossistdelen i byggjevareforretninger som sel til handverkarar og liknende
Butikkar i kjøpsenter kan halda ope for henting av førehandsbetalte, tinga varer når det er etablert smittevernfagleg forsvarlege løysingar for utlevering.
Restaurantar, kafear, barar
Serveringsstader kan vera opne.
Det er likevel skjenkestopp.
Følgjande verksemder og stader skal halda stengt:
• Treningssenter
• Fornøyelsesparkar, bingohallar, spelehallar, leikeland, bowlinghallar og tilsvarande stader der det går føre seg underhaldnings- eller fritidsaktiviteter
• Museum
• Kino, teater, konsertstader og tilsvarande kultur- og underhaldningsstader
• Andre offentlege stader og verksemder der det går føre seg kultur, underhaldnings- eller fritidsaktivitetar som samlar folk innandørs.
Unntak er:
• Bibliotek (men biblioteka opnar førebels ikkje i Kvam)
• Offentlege stader og verksemder kan halda ope for utandørs fritidsaktivitetar for vaksne
• Offentlege stader og verksemder der det går føre seg organiserte kultur-, idretts- og fritidsaktiviteter kan halda opee for born og unge under 20 år, utandørs aktivitet for vaksne og organisert trening for toppidrettsutøvarar, likevel slik at det ikkje skal føregå fritidsaktiviteter for andre på slike stader. I Kvam herad er idrettshallar o.l. inntil vidare stengde etter lokal forskrift.
Tilrådingar
Den nasjonale tilrådinga om besøk heime gjeld. Det vil seia å avgrensa sosial kontakt og ikkje ha besøk av fleire enn fem gjester i tillegg til dei som allereie bur saman. Born i barneskular og barnehagar kan ha besøk frå eigen kohort.
Alle bør unngå unødvendige reiser. Reise til arbeid er å sjå på som ei nødvendig reise, men krav om heimekontor gjeld for dei som har moglegheit til det.
Ein bør berre reisa til fritidsbustader saman med medlemer av eigen husstand, og ikkje ta imot besøk. Gjer unna innkjøp i eigen kommune før avreise; nærbutikk i hyttekommune bør berre brukast dersom det er strengt naudsynt og ein tek særskilte smittevernomsyn, til dømes å gå i butikken utanom dei travle tidene. Ikkje oppsøk butikkar, serveringsstader eller møteplassar med mange menneske i hyttekommunen. Hald god avstand til andre i skiløypa, skitrekket og på gåtur. Sjekk kva råd og reglar som gjeld for hyttekommunen og følg dei.
Ein-til-ein-verksemder, til dømes frisørar, bør framleis ha forsterka tiltak som bruk av munnbind i situasjonar der det ikkje er mogeleg å oppretthalda ein meters avstand eller å redusera eller mellombels fjerna behandlingstilbod som inneber nær ansikt-til-ansikt-kontakt.
Personar med høg risiko for å verta alvorleg sjuk eller døy dersom dei vert smitta bør framleis leva meir skjerma enn til vanleg.
Plikt til å bruka munnbind
Det skal brukast munnbind:
• i butikkar, på serveringsstader, i trus- og livssynshus, på kollektivtransport og i innandørs stasjonsområde, og i lokale for kultur-, sports- og fritidsaktivitetar når det ikkje er mogleg å halda minst ein meters avstand
• av passasjerar i taxi, også av sjåfør når det er passasjerar i taxien
• av tilsette på stader der det ikkje er mogleg å halda minst ein meters avstand frå besøkande, med mindre det er sett i verk andre smitteverntiltak som bruk av visir, skiljevegger eller liknande, i tråd med Folkehelseinstituttet sine tilrådingar
Plikta til å bruka munnbind gjeld ikkje for born under 12 år, eller for dei som av medisinske eller andre årsaker ikkje kan bruka munnbind.
Kjelde: Kvam herad
Artikkelen held fram under annonsen.
Kan samlast utandørs
Ullensvang kommune går frå nivå B til nivå D. Det inneber mellom anna at vidaregåande skule går ned til gult nivå, og at det ikkje lenger er forbode å driva med idrett og fritidstilbod utandørs for vaksne.
Ulvik held fram med dei strengaste tiltaka på nivå A. Eidfjord og Voss held fram på nivå B.
