– Influensavaksinen ekstra viktig i år
– Alle som vil redusera risikoen for å verta influensasjuk i haust, bør vaksinera seg.
Det skriv apotekar Sidsel Rykken i ei pressemelding. Ho er farmasøyt og dagleg leiar ved Boots Apotek Linnea i Øystese og tilbyr vaksinasjon i apotek.
– Det som er viktig å hugsa på, er at koronavaksinen ikkje vernar mot sesonginfluensa. Eg kan forstå at somme synest det er kjedeleg å måtta ta endå ei sprøyte i år, men i år er det ekstra viktig, seier Rykken.
Hard sesong
Folkehelseinstituttet spår ein hard influensasesong fordi det er få som har hatt influensa dei siste åra.
Dersom du kjenner deg sjuk, skal du ikkje koma inn på apoteket. I tillegg er feber eit teikn på at immunsystemet allereie jobbar med å slå ned ein infeksjon. Vaksinasjonen må i så fall utsetjast, opplyser Rykken.
Har du nett teke ein annan vaksine, må du venta minst ei veke. Det gjeld for alle typar vaksinar. Etter at du har fått influensavaksinen, må du venta på apoteket i minst 20 minutt for å vera sikker på at det ikkje oppstår ein allergisk reaksjon.
– Dei aller færraste opplever biverknader, men influensavaksinen kan føra til at stikkstaden vert øm, raud og heva. Nokre kan oppleva lett feber, litt sjukdomskjensle eller muskelsmerter. Allergiske reaksjonar eller andre alvorlege biverknader førekjem svært sjeldan, seier Rykken.
– Mange ynskjer å vaksinera seg på same tid, og apoteka er lett tilgjengelege. Dei har òg eit tilbod om vaksinasjon til innbyggjarar som ikkje er i risikogruppene. Ein kan stikka innom apoteka i Øystese eller Norheimsund for å få sett vaksinen når det høver best for den enkelte, seier Rykken.
50 eller 150
Fastlege ved Norheimsund Legesenter DA, Martin Erdal, seier det er eit topris-system for betaling av vaksinar. Dei som er i definerte risikogrupper – alle over 65 år og dei som har definerte sjukdomar – får tilbod om subsidiert vaksine frå staten. Dei betalar 50 kroner viss dei ikkje har frikort. Viss dei har frikort hjå lege, er det gratis.
Dei som er yngre enn 65 år og ikkje har desse definerte sjukdomane, får ikkje tilgang til gratis vaksine, og må få vaksine på apoteket. Apoteket tilbyr seg å vaksinera dei.
– Viss dei heller ynskjer å koma til legen for å få sett ein vaksine som dei hentar på apoteket, så tek me 150 kroner for det, seier Erdal.
