Anders Riise, juryleiar og styremedlem i Noregs Mållag, delte ut prisen til Ingunn Bjørke.

– Imponerande heilskapleg profil

Optima Produkter AS i Kvam er tildelt nynorsk næringslivspris frå Noregs Mållag.

Publisert Sist oppdatert

Dagleg leiar Ingunn Bjørke tok imot prisen under haustseminaret til mållaget laurdag.

– Verksemda får prisen fordi ho har ein imponerande heilskapleg språkprofil, som gjennomgåande held den høgaste språklege kvalitet, seier Anders Riise, juryleiar og styremedlem i Noregs Mållag, i ei pressemelding.

Mållaget meiner prisvinnaren nyttar det same gode språket i alle flater, til dømes på heimesida, Facebook og Instagram – og på sjølve produkta.

– Ikkje minst merkar juryen seg måten firmaet marknadsfører seg på, som i tillegg til godt språk er prega av god informasjon, humor og originalitet. At alt dette vert formidla på nynorsk, er svært gledeleg å sjå, seier Anders Riise.

Juryen vonar at andre ser det gode i å nytta nynorsk i marknadsføringa.

– Me trur at å bruka det språket som best uttrykkjer den kulturen ein vil knyta identiteten sin til, er det som gjev det beste resultatet. I vår tid er det å vera unik ein viktig verdi, og her gjev nynorsken eit klart konkurransefortrinn, seier Anders Riise.

Vinnaren vart etablert i 1997 og har seks tilsette.

Laga med Labrador CMS