Ikkje tunnel, men tunell
Alle nye tunnelar i Vestland fylke får ny skrivemåte om ikkje kommunane protesterer.
Det vart utfallet då den nye tunnelen ved Kroka i Kvinnherad skulle få namn. I ei høyring kom det inn to uttalar der avsendarane reagerte på skrivemåten «tunnel».
Ingvard Tveitnes meinte at det, jamfør stadnamnlova, er den lokale uttalen som skal liggja til grunn for skrivemåten. I Kvinnherad vert dette «tunell», så nyvinninga burde heita Krokatunellen, påpeika han.
Språkrådet skreiv i ei fråsegn at dei to skrivemåtane er jamstelte både på bokmål og nynorsk, og at det er skrivemåten «tunell» som ligg nærast den dialektuttalen som ordet har på Vestlandet. Også rådet viste til stadnamnlova, og tilrådde at skrivemåten «tunell» vert nytta i heile Vestland fylke.
Fylkesutvalet slutta seg 8. mars samrøystes til framlegget. Om ein kommune ynskjer den gamle skrivemåten, skal dette leggjast vekt på, og vedtaket får ikkje tilbakeverkande kraft.
– Med «tunell» får me ein skrivemåte som samsvarar betre med vestlandsdialektene, og det er fint, seier fylkesordførar Jon Askeland.
