Edvin Andre Skår i Hardangerfjord Seaweed AS har spurt Kvam herad om akvakulturområdet som selskapet disponerer aust for Steinstø, kan nyttast til andre akvakulturføremål enn dyrking av tang eller tare. Skår spør òg om korleis heradet vil stilla seg til ein søknad om oppdrett av annan matfisk enn laks og aure på staden.
Rådmannen svarar at det i vurderingane i samband med ny kommuneplan vart lagt til grunn at området skulle nyttast til tang- eller tareproduksjon.
Området ligg inne i eit såkalla bestemmingsområde. Her er ikkje oppdrett av anadrom laksefisk tillate.
— I vurderingane våre skilde me mellom produksjon av fisk og annan produksjon som skjel, tang og tare. Sett i ettertid burde me nok vore tydelegare med omgrepsbruken og heller nytta ordet matfisk i staden for anadrom laksefisk. I konsekvensvurderinga er det ikkje teke høgd for produksjon av fisk, og kommuneplanen sin intensjon er fylgjeleg at arealet ikkje er tiltenkt oppdrett av matfisk, skriv rådmannen.
