Ikkje streik blant lastebilsjåførane
Over 1.000 lastebilsjåførar kunne ha vorte tekne ut i streik frå onsdag morgon, men to timar på overtid kom partane til semje.
Fristen gjekk opphavleg ut ved midnatt natt til onsdag.
Meklinga gjekk føre seg mellom Yrkestrafikkforbundet (YTS) og Fellesforbundet på arbeidstakarsida og Norges Lastebileierforbund og NHO Logistikk og Transport på arbeidsgivarsida for høvesvis godsbilavtalen og transportovereinskomsten.
Artikkelen held fram under annonsen.
Viss det hadde vorte streik, hadde køyring av bulk-gods som mjøl, gass, glas og betong vorte ramma. Det same hadde stykkgods, som mellom anna omfattar køyring ut til butikkar.
– Vi er fornøgde med at vi fann ei løysing som gjer at vi unngår streik, seier forhandlingsleiar Linda Jæger i Yrkestrafikkforbundet.
Ifølgje Fellesforbundet vil timelønna auke med totalt 6,30 kroner.
– Vi har funne ei løysing i ein vanskeleg situasjon. Pandemien påverkar òg bransjen vår. Gjennom forhandlingane har vi fått gjennomslag for auka lønn og utvikling av avtalen, seier forhandlingsleiar Ole Einar Adamsrød i Fellesforbundet.
No skal forhandlingsresultatet ut på uravstemming til medlemmene i Yrkestrafikkforbundet og Fellesforbundet 12. november.
(©NPK)
