– Ikkje skru ned varmen i rom med vassrøyr
Når straumen er dyr fører det ofte til at folk skrur ned varmen. Men det beste rådet mot frosne røyr er nettopp å ikkje spara på straumen, sjølv om prisen er høg, seier røyrleggar.
– Eg var på ei hytte der vatnet hadde frose. Hytteeigaren ringde meg på kvelden og eg måtte opp og tina røyra. Rekninga kom på 20.000 kroner, og han angra bittert på at han var så gjerrig med straumen, seier røyrleggar Stian Kallesten til NRK.
Røyrleggaren meiner vi bør ha rundt 12 til 15 grader i romma. Vidare fortel han at ein fint kan bruka snøen til noko nyttig. Ved å kasta snøen oppetter utandørsveggene kan ein laga ein skråkant som isolerer mot trekk og kuldegjennomslag.
Artikkelen held fram under annonsen.
– Det er gratis isolasjon, seier Kallesten.
Fremtind forsikring fryktar at talet på skadar på sprekte vassrøyr kan stiga no som det er venta å bli særs kaldt fleire stader i landet.
– Sprengkulde og straumsparing er ein dårleg kombinasjon. Du risikerer å få avkorting i erstatninga om du ikkje har på nok varme og får ein frostskade, seier skadeførebyggar Therese Hofstad-Nielsen i Fremtind, forsikringsselskapet til Sparebank 1 og DNB.
Ifølgje Fremtind kan ein tømma røyr for vatn eller stengja av utvendige og innvendige stoppekraner før ein reiser frå hytta.
(©NPK)
