– Ikkje rydd opp etter skred!

Styresmaktene har ei klar melding til dei som er onnuge etter å rydda.

– Kommunane og dei andre beredskapsaktørane er urolege for at folk på eiga hand skal ta til å rydda opp etter skred og flaum, mens situasjonen enno er ustabil, skriv fylkesberedskapssjef hjå Statsforvaltaren i Vestland i ei pressemelding sundag.

Ei gravemaskin på Måge vart teken av skred laurag. Hendinga syner kor farleg det kan vera å byrja oppryddinga for tidleg, heiter det i pressemeldinga.

Statsforvaltaren, Noregs vassdrags- og energidirektorat og Meteorologisk institutt har hatt statusmøte med kommunane laurdag kveld og sundag. Det er venta mykje nedbør også sundag, etter at regnet roa seg i natt.

I fleire område i Ullensvang er folk evakuerte frå bustadhus. Ei rekkje vegar i Vestland er stengde. Statsforvaltaren oppmodar folk som er i ein vanskeleg situasjon, om å melda frå til kommunen eller politiet.