– Ikkje noko straffbart bak ulukke

Politioverbetjent Andor Helgheim ved Kvam politistasjon opplyser til HF at saka er lagd vekk. Avgjerda kan vel å merka påklagast.

Eit spørsmål som framleis står utan svar, også etter etterforskinga av undersøkingssaka, er kva som var den utløysande årsaka til at båten vart ført med straumen til fossen øvst i Tokagjelet.

Vitneobservasjonar har ikkje kasta lys over dette. Helgheim påpeikar at det ikkje finst data som dokumenterer vassføringa i området, så ein kan heller ikkje samanlikna vassføringa på den aktuelle kvelden og andre tidspunkt.

Kartlegg tilhøva

Som HF har skrive før, er det Noregs vassdrags- og energidirektorat (NVE) som har fylgt opp saka som tilsynsstyresmakt overfor Clemens Kraft AS, som byggjer kraftverk ved utløpet av Langvotnevatnet.

NVE har etter nyttår varsla utbyggjaren om at direktoratet vil gjennomføra hydrologiske og hydrauliske berekningar for å klarleggja korleis flaumtilhøva var ved Langvotnevatnet då ulukka hende.

Direktoratet har difor bede Clemens Kraft om å senda ymse dokumentasjon knytt til anlegget, mellom anna kart, teikningar, hydrologiske data og vasstandsmålingar.

— Mista truleg kontrollen

Eit eventuelt varselskilt ved Langvotnevatnet ville ikkje ha hindra ulukka, meiner Clemens Kraft. Denne påstanden går fram av den obligatoriske rapporten om hendinga som kraftutbyggjaren nyleg sende til NVE.

— Etter det me er kjende med, drog personane ut i båt nedstraums der elva naturleg startar ved større vassføring. Desse var sannsynlegvis godt kjende med fossen i Tokagjelet, då dei — etter det me har lese — var hytteeigarar i området. Ei eventuell varsling av terskelen med skilt eller ei lense ville ikkje ha avverja situasjonen, hevdar kraftutbyggjaren.

Clemens Kraft meiner at den trulege årsaka til ulukka er at personane i båten mista kontrollen då dei skulle kryssa elva. På kryssingspunktet påverkar ikkje damterskelen vassføringa, hevdar utbyggjaren.

— Inntaket har minimal påverknad på elva. I den grad det er nokon, er dette ved at terskelen kan ha «stuva opp» vatnet og redusert farten på vatnet noko ned mot terskelen. Det er, så langt me forstår det, ingen direkte samanheng mellom bygginga av våre konstruksjonar og ulukka, skriv Clemens Kraft i rapporten.

Selskapet viser til at vatnet har naturleg høg fart og stor kraft forbi inntaket når vassføringa er stor, og meiner at installasjonane ikkje har påverka henne.

Sette opp skilt

Som HF skreiv i desember, har Clemens Kraft vurdert risikoen for alminneleg ferdsle i området etter damtryggleiksforskrifta. Utfallet var at det vart sett opp varselskilt om terskelen både nær han og ved kryssingspunktet lenger vest.

Ifylgje rapporten har selskapet no gjort det tydeleg i internkontrollrutinane at risikoen skal vurderast spesifikt etter den nemnde forskrifta, ikkje berre generelt i samband med anleggsarbeidet, før byggjestart. Og når eit kraftverk går frå anleggsfasen til drift, skal vurderingane reviderast.

Ifylgje rapporten danna Clemens Kraft eit team på fire personar, mellom dei administrerande direktør Knud Hans Nørve, som skulle handtera situasjonen etter ulukka. Utbyggjaren og entreprenørane stilte brakkeriggen til disposisjon for leitemannskap, og botntappeluka ved damterskelen vart teken i bruk for å betra leitetilhøva.

Rapporten fortel at planen er å setja kraftanlegget i prøvedrift i april. Medan inntaket ligg i Langvotnevatnet, ligg kraftstasjonen på Neteland.