Ikkje nøgd med setjefiskanlegg

Forvaltaren skal vurdera alle løyve som er eldre enn ti år. Sidan løyvet til anlegget er frå 2007, har ein gått gjennom det på nytt. I eit brev sendt til Mowi ASA skriv Statsforvaltaren mellom anna at ein kontroll gjennomført i 2013 synte at tilstanden på havbotnen ved anlegget var svært dårleg.

Ein kontroll i 2015 synte at fleire vilkår i løyvet ikkje var stetta. Mellom anna er ikkje ein plan for reinsing av avløpet følgd opp.

Mowi har heller ikkje sendt inn miljørapportar om tilstanden på havbotnen etter 2013, trass i at verksemda i 2015 forplikta seg til å gjennomføra miljøgranskingar kvart tredje år.

Krav til utsleppsreduksjon

Statsforvaltaren krev ein reduksjon i utsleppa frå alle anlegg som produserer meir enn 250 tonn biomasse. Anlegget i Herand fekk i 2007 løyve til å produsera 290 tonn. Om produksjonen er så stor, vil forvaltaren stilla strengare krav til reinsing. Forvaltaren krev også at verksemda sender inn miljøgranskingar gjennomførte etter 2013.

Brevet frå Statsforvaltaren vart sendt til Mowi kort tid etter at avisa Dagens Næringsliv skreiv om dårleg kontroll av settefiskanlegga i Hardanger. Det hevdar seniorrådgjevar og biolog Tom N. Pedersen, som er ein av dei som har signert brevet til Mowi, ikkje har noko med saka å gjera.

– Me skal rutinemessig oppdatera alle løyve som er eldre enn ti år, men har ikkje arbeidskapasitet til å gjera alt raskt nok. At me tek tak i denne saka no, er tilfeldig, seier han.

– Får ingen konsekvensar

Kommunikasjonsdirektør i Mowi, Ola Helge Hjetland, skriv i ein e-post til HF at anlegget i Herand følgjer krava i løyvet og at brevet frå Statsforvaltaren ikkje vil påverka drifta. Sjølv om anlegget har løyve til å produsera 290 tonn, har produksjonen dei siste tre åra vore lågare enn 250 tonn.

Han opplyser at Mowi har gjennomført regelmessig miljøovervaking av området rundt anlegget.

– Dette gjorde me mellom anna i 2013, 2017 og 2022. Undersøkelsen i 2013 viste høge verdiar på eitt av ti målestader, medan undersøkingane i 2017 og 2022 konkluderer med god og svært god miljøtilstand, skriv Hjetland.

Han har sendt kopi av undersøkingane, som er gjennomførte av Rådgivende Biologer AS, til HF. Påstanden om betring stemmer ut frå desse.

Han skriv vidare at det vart laga ein plan for å innføra reinsing dersom det vart naudsynt i 2015. Sidan situasjonen har betra seg, valde Mowi å venta med å gjennomføra planen.

Hjetland hevdar òg at påstanden om at Mowi ikkje har sendt miljøundersøkingar gjennomførte etter 2013 til Statsforvaltaren, er feil. Undersøkingane frå 2017 og 2022 er båe sende inn, opplyser han.