– Ikkje låste til bompengar

Det forsikra leiar for samfunn, kultur og næring i Kvam herad, Jon Nedkvitne, då formannskapet onsdag tilrådde å vedta kommunedelplanen for tunnel frå Kletten til Eikedalen.

Bodbringar for handelen

Lisbeth Fredheim Oma (KrF) hadde prata med folk i handelsnæringa som uroar seg over at ein kan binda seg til å akseptera høge bompengar ved å vedta ein dyr tunnel.

– Har me låst oss til alternativet? spurde ho.

Nedkvitne påpeika at det vert arbeidd politisk for å få tunnelprosjektet fullfinansiert, og at ingen ynskjer høge takstar. Om ein ikkje lukkast, må ein vedta ein ny kommunedel- og reguleringsplan. Ein er altså ikkje bunden til masta.

Varaordførar Frode Nygård (Frp) understreka at politikarane ikkje seier noko om bompengar no.

– Det er eit reint rassikringsprosjekt. Noko anna ville vorte merkeleg. Rassikring er i utgangspunktet finansiert av fylkeskommunen og staten, sa Nygård.

Det tilrådde alternativet er kostnadsrekna til mellom 1,9 og 3,1 milliardar kroner. Fylkeskommunen har sett av om lag ein firedel av summen til prosjektet. Rådmannen ynskjer dialog med fylkeskommunen om finansieringa etter at planen er vedteken.

– Går ikkje utan

– Ein gledas dag, sa Jostein Ljones om planvedtaket, som vel å merka vert gjort fyrst av heradsstyret tysdag.

Han trur på si side ikkje at ein får realisert tunnelen utan bompengar, sjølv om det ikkje er ynskeleg.

Han meiner politikarane har ein umåteleg viktig jobb å gjera overfor folkevalde i fylkeskommunen og staten for å få prosjektet fullfinansiert. Vidare må ein syta for at rassikring vert ein hovudprioritet på Vestlandet i Nasjonal Transportplan neste år, meiner han.

Eit vedtak i saka no er viktig for å koma seg vidare og halda på plassen på toppen av rassikringslista i Vestland. Han minte om at vegen er vorte eit viktig aust–vest-samband med aukande trafikk.

– Eg trur me har gode kort på hand, sa han.

– Kjemp for prinsipp!

Ordførar Torgeir Næss (Ap) viste til at representantar for Sp og Frp har uttrykt at staten må bidra, og at Ap har kome med innspel om det same. Han varsla at Hardangerrådet truleg vil koma med ei «saftig» fråsegn om saka.

Næss utelukkar ikkje at kvammapolitikarane vert nøydde til å gjera eit prinsippvedtak om at dei aksepterer bompengar for å koma vidare i prosessen, men at det ikkje treng vera meir omfattande enn å godta lenging av innkrevjinga i Kvammapakken.

– Å få saka gjennom om me totalt avviser bompengar i starten, kan verta vanskeleg, sa Næss, som meiner saka er uløyseleg utan statleg bidrag.

Næss meiner ein ikkje bør snakka for mykje om Tokagjelet isolert, men i staden argumentera for prinsippet om at staten heilt eller delvis må finansiera omkøyringsvegar som avlastar viktige riksvegar. Dessutan må ein arbeida for at meir pengar vert løyvde til rassikring, meiner han.

Inga rundkøyring

Kari Mostad (MDG) er nøgd med den valde traseen og at ein ikkje råkar dyrka jord på Skeie, slik det eine alternativet la opp til.

Nygård fekk full støtte til eit framlegg om å be fylkeskommunen ta omsyn til behova til Lid Jarnindustri AS, som planlegg å utvida verksemda, i arbeidet med reguleringsplanen. Verksemda har fått løyve til å føra opp mellombelse tiltak, men ikkje permanente løyve. Frp uroar seg over at planarbeidet kan verta eit hinder for utviklinga av familieverksemda til Lid-familien.

Miljø-, plan- og bygningsutvalet drøfta saka tysdag. Då tok Geir Madsen (SV) til orde for å byta det planlagde, ordinære krysset i Eikedalen med ei rundkøyring, men ingen andre støtta framlegget. Madsen meiner rundkøyringa ville ha gjeve ein annan effekt når bilførarane skal vurdera kvar dei skal køyra.