– Ikkje grunnlag for mistru
Sp fekk ikkje gjennomslag for å delta i Ukraina-hjelpeprosjektet saman med Lesja og Marijampolė.
Partiet bøygde til sist av – «med tungt hjarta», som Svein J. Stuve (Sp) sa – og stilte seg 27. september bak eit framlegg om å venta med å ta stilling til deltaking i samarbeidsprosjektet som mellom andre kvemming Agnar Høysæter har teke initiativ til.
Heradsstyret vil, i motsetnad til rådmannen, ikkje avslutta venskapen med Marijampolė kommune i Litauen.
Tru og tvil
Tillit vart eit nøkkelord i debatten. Fleirtalet som ikkje ynskjer å hoppa inn i prosjektet Humanitær bistand til Ukraina med det same, meiner hjelp via Marijampolė kan vera risikabelt. I alle fall meir risikabelt enn det andre alternativet som har dukka opp: hjelp via Hardangerrådet og Haukeland universitetssjukehus direkte til Ukraina.
Gjermund Stuve (Sp) meiner fleirtalet motseier seg sjølv i saka. Han siktar til at partia på den eine sida vil vera ven med Marijampolė, men på den andre sida ikkje stola nok på kommunen til å handla rimelege varer i Litauen og senda til Ukraina.
– Ein kan velja å tru at det er uvisst kor mykje som kjem fram, men det er òg uvisse om kor mykje som går til administrasjon og kostnader i vårt høgkostland. Me sender eit veldig dårleg signal, sa Stuve.
– Me har mykje å vera redde for, men ikkje for at nokre kroner ikkje kjem fram. Me har gode erfaringar med Marijampolė og ingen grunn til å mistru at dette skal vera eit problem, sa Svein J. Stuve (Sp).
– Det er ikkje det at me ikkje stolar på Marijampolė. Å ta omsyn til risiko er ikkje det same som ikkje å stola på nokon. Det handlar ikkje om tillit, men om å velja den kanelen som er minst risikabel. Det meiner eg er gjeve her, sa ordførar Torgeir Næss (Ap).
Han meiner det er viktig å sikra at hjelpa kjem fram. Det gjer ein best gjennom etablerte hjelpeorganisasjonar, trur han.
– Om me har høve til å velja ein kanal som er sikker, bør me gjera det, sa Næss.
Frode Nygård (Frp) påpeika at hjelpeprosjektet med Lesja og Marijampolė går ut på å samla inn pengar. Det trur han, i motsetnad til Svein J. Stuve, ikkje vil bidra til å skapa særleg engasjement i Kvam.
Fekk motbør
Framlegget om å delta som Sp trekte, gjekk ut på å peika ut ei lokal prosjektgruppe og finansiera deltakinga med pengar frå disposisjonsfondet i 2023 og i budsjettet i seinare år. Rådmann Anita Hesthamar påpeika at dei økonomiske rammene ikkje var definerte.
Sp ville i tillegg oppretta ei lokal prosjektgruppe med administrasjon, politikarar, frivillige lag og andre relevante personar. Administrativ rådgjevar Kari W. Vik påpeika at ein ikkje kan ha representantar for både administrasjonen og heradsstyret i same utval.
