– Ikkje ei grei tolking
Ottar Randa (H) er kritisk til at rådmannen utvida solskjermingsprosjektet. Rådmannen meiner ho ikkje har gjort noko gale.
8,42 millionar kroner skal brukast på solskjerming av ymse såkalla føremålsbygg i kommunal eige. Heradsstyret bad i vinter berre om at skjerming av institusjonar med bebuarar vart vurdert, men rådmannen utvida prosjektet til mellom anna skular og barnehagar.
– Dette er eit prosjekt som har vakse betydeleg frå ideen vart lansert, slo Bjørgulv Hauger (Frp) fast då heradsstyret drøfta saka 16. mai.
– Det var mogeleg for administrasjonen å koma med ynsket då me vedtok budsjettet. Det handlar om respekt for vedtaka til heradsstyret, sa Randa.
– Det synest eg er ei lei tolking. Det står administrasjonen fritt å ta initiativ til å kartleggja utover rammene som er gjevne. Dette er ei sak me kunne koma med uavhengig av bestillinga frå heradsstyret. Heradsstyret står fritt til å avgrensa prosjektet, sa rådmann Anita Hesthamar.
Hauger meiner den kalkulerte snittprisen på 20.000 kroner per vindauga verkar høg, sjølv om utforminga av vindauga vil variera mykje. Han påpeika at ein bør leita etter standardiserte løysingar som er enkle å halda ved like og varar lenge.
Teknisk sjef Lars Ese Ur viste til at prisen er basert på røynsle og at ein del av vindaugo er monaleg større enn i eit bustadhus. Prisane i private bustader og offentlege bygg kan såleis ikkje samanliknast direkte, meiner han. Ur viste dessutan til at det finst både enkeltståande vindaugo og samanhengande vindaugo, og at ein kanskje må montera straumtilgang til skjerminga.
Jostein Moldsvor (KrF) undra om det vil vera betre å bruka fond enn lån til å finansiera investeringa. Rådmannen påpeika at bufferen vil minka fort om ein skal bruka disposisjonsfond til investeringar, og at fondet elles vert nytta ivrig til ymse føremål.
Investeringa vart samrøystes vedteken – med lån som pengekjelde.
