Ikkje berre matvekstar får stønad

Det opplyser Landbruks- og matdepartementet i ei pressemelding på regjeringen.no.

Helsepolitisk talsperson for Sp på Stortinget og medlem i helse- og omsorgskomiteen, Hans Inge Myrvold, opplyser til HF at saka har ført til stort engasjement frå lokallaget i Kvam sidan saka er viktig for ei rekkje føretak her. Myrvold har fylgt henne opp frå Stortinget si side.

Forslaget om ei mellombels forskrift om straumstønad til jordbruks- og veksthusnæringa som fylgje av ekstraordinære elektrisitetsutgifter har vore på høyring. Forskrifta vidarefører straumstønaden, inkludert blomeproduksjon, ut 2023. Vatningslag inngår òg i ordninga.

I høyringa vart det mellom anna føreslege å målretta ordninga for landbruket til matproduksjon. Det ville ha innebore ei innstramming av stønaden til veksthusnæringa, slik at produksjon av blomar og andre prydplanter ville ha falle utanfor.

– Me har fått mange gode innspel i høyringa. For meg er det viktig å lytta til næringa, og me har difor landa på at det er rett å vidareføra stønaden til blomeproduksjon i veksthus. Veksthusproduksjon er svært straumkrevjande, og næringa har opplevd store utfordringar som fylgje av auka straumprisar. For regjeringa er det viktig å oppretthalda norsk produksjon. Blomar og prydvekster er ein viktig del av økonomien og grøntproduksjonen i veksthusnæringa, seier landbruks- og matminister Sandra Borch (Sp) i pressemeldinga.

Den nye mellombelse forskrifta for perioden april 2022–mars 2023 vil verta fastsett før sommaren, ifylgje Landbruks- og matdepartementet.