– Ikkje alle overheld vikeplikta

Rådet stiller seg bak meldingane som er komne frå skuleelevane i Kvam i rapporten «Barnetråkk». Han vart laga i 2021 og seier noko om korleis born og unge brukar og opplever dei fysiske omgjevnadene.

Elevrådet har no kome med eit innspel til den kommunale trafikksikringsplanen. I innspelet kjem det fram at elevane ynskjer eit gangfelt i Kyrkjevegen for å tryggja elevar som skal kryssa vegen frå idrettsplassen og gå bort til gangvegen.

Skuleborna opplever at ikkje alle bilar stoppar ved gangfeltet mellom Esso-stasjonen og Straumen. Dei påpeikar elles at gjerdet på baksida av skulen ikkje er sterkt nok til å ta imot bilar dersom dei sklir eller køyrer av vegen.

Elevane synest det er mykje trafikk ved busshaldeplassen i sentrum ved skulestart og skuleslutt. Her er det dessutan lite utelys. Borna synest at det vert strødd for lite i uteområdet når det er glatt. Mange elevar kjem for nær bussane når dei kjem køyrande inn på haldeplassen, meiner dei.

Innspelet er ført i pennen av elevrådskontakten ved Norheimsund skule, Nina Nedrebø.