Idrettslag vil hausta renter

Laget vonar bygdefolk og Strandebarm-patriotar vil yta mindre eller større gåver til fondet. Avkastinga skal gå til framtidig vedlikehald av idrettsanlegga til laget.

Laget eig anlegg til ein verdi på over 30 millionar kroner, skapte av eigenkapital, private gåver, offentleg stønad og fleire tusen timar dugnad frå folk i bygda.

– Dette må takast vare på for å sikra idrettsglede for heile regionen for komande generasjonar, påpeikar kasserar og skrivar Olav Sletvold i eit informasjonsskriv.

Pengane vil verta forvalta på ein trygg og god måte, lovar han.

Frir til patriotar

Fondet er ein idé som har mognast over tid, seier Sletvold.

– Me som har vore med heilt frå starten i 1999 og bygt anlegga, har lagt igjen litt av oss sjølve i desse prosjekta. Me føler eit ekstra ansvar som yngre folk og våre etterkomarar kanskje ikkje vil føla. Det er motivasjonen, seier han.

Storleiken på avkastinga kjem an på kor godt fondet vert forvalta. Laget har hatt kontakt med folk som driv i finansbransjen, mellom anna i Sparebanken Vest. Ein ynskjer å knyta til seg den ekspertisen som er naudsynt for å forvalta pengane godt.

Laget vil plassera dei for det meste i fond, og i obligasjonar og papir som gjev avkasting over det banken gjev.

– Viss me klarar å konkurrera med høgrenta i banken, så må det vera eit mål, seier kasseraren.

Planlegg sponsa løp

Ifylgje Sletvold er det vanskeleg å seia kor mange gjevarar som kan koma til. Laget har 470 medlemer og mange støttespelarar. Det er nok ikkje mange andre idrettslag i Kvam som har like mange, trur han.

– Sundag skal det vera basar. Det gjev ikkje dei store pengane, men me veit at det er enkelte som har mykje pengar. Kan me få dei med på laget, så vert det fort pengar av det, seier Sletvold.

Fondet har allereie fått ei privat gåve på ein halv million kroner. Idrettslaget har sett inn 200.000 kroner, så ein nærmar seg den fyrste millionen. I mai planlegg laget eit 24-timarsløp der sponsorar kan bidra etter talet på rundar laget klarar å springa. Framnes Kristne Vidaregåande Skule sprang nyleg inn 1,1 millionar kroner til misjonsprosjektet med ein tilsvarande framgangsmåte.

– Me vil læra av dei. Det kan verta vellukka. Ideen er noko me jobbar med. Og gjev det valuta i kassen, så kjem me gjerne til å gjenta det årvisst, seier Sletvold.

Vedlikehald kostar

Idrettslaget brukar i underkant av ein halv million kroner på drift i året. Ein løna driftsleiar har det daglege ansvaret.

– Men med dei straumrekningane me har fått no, fyk pengane fortare frå oss enn me ynskjer. Me driftar fire bygg. Det vert ikkje billegare med åra, seier Sletvold.

Laget har vore heldig og fått kommunal stønad, men sidan starten med 150.000 kroner i kommunal stønad i 1999–2000 har verdien krympa.

– Me treng meir pengar. Me brukte nett halvannan million kroner på å rusta opp dekket på friidrettsbanen. Det må me gjera kvart 15. år. Heradet hadde ikkje pengar til å bidra, sjølv om det var heradet som bygde det ut. Idrettsanlegget har overteke banen, og vart sjølvsagt sitjande att med rekninga.

Laget har ein god dugnadsgjeng, men til enkelte tekniske ting treng ein profesjonelle folk.

– Me oppmodar folk til å bidra og sjå verdien av anlegget for bygda i eit langsiktig perspektiv. Det er dei som sit på dei store pengesekkene me aller helst vil skal bidra, men det er usikre tider, og me er alle råka av skattar og høgre straumrekningar. Det er kanskje ikkje rette taiminga, men sånn er det – ein kan aldri vita, seier Sletvold.

Strandebarm Idrettslag har valt eit styre der leiar Inge Tangerås og styremedlemene Frank Lunde, Vigdis Håland og Karl Erik Berge har plass i tillegg til Sletvold.