I mål etter tre år: – Viktig milepæl

Det seier styreleiaren i Investeringsstiftinga Hardanger Voss, Per Berge. Sparebankstiftinga Hardanger har saman med herada i Hardanger og Voss jobba med ein modell for den nye investeringsstiftinga i tre år, skriv stiftinga i eit presseskriv.

Torsdag 27. juni samlast medskiparane til eit skipingsmøte.

– Vêr stolte

Mellom talarane var Aslak Sverdrup, regiondirektør i Innovasjon Noreg. Han sa at den nye stiftinga er ekstremt viktig for verksemder, for å kunna byggja musklar og løfta «tidleg fase-prosjekt» regionalt.

– De har all grunn til å vera stolte over jobben som er gjort, sa Sverdrup.

Han har sjølv vore gründer, og peika på den vanskelege fasen der ein er i gang med eit nytt prosjekt og det er på tide å ta steget vidare. Kor kan ein då skaffa pengar? Innovasjon Noreg gjev tilskot, men har berre lov til å vera med på inntil 50 prosent. I ein slik fase er det ikkje sikker ein har lyst til å selja aksjar, og det er vanskeleg å få tilgang på kapital. Difor meiner Sverdrup denne stiftinga er sårt trengd.

– Lukke til med denne fantastiske, viktige milepælen. Det er eit stort skritt for å styrkja og komplementera økosystemet for entreprenørskap, innovasjon og grøn omstilling for Voss og Hardanger, sa han.

Lettare å satsa?

Til hausten vil Investeringsstiftinga Hardanger Voss skipa eit såkornfond. Endeleg investeringsmandat og profil skal utarbeidast etter sommaren. Også ein investeringskomité og eit styre skal utnemnast. Vona er at den fyrste investeringa skal skje allereie i år, opplyser styreleiar Berge.

Meininga er at investeringane i ulike prosjekt skal kasta av seg, og gje såkornfondet endå meir musklar. Berge ser føre seg at fondet vil investera i gründerverksemder med vekstpotensial, omstilling av eksisterande verksemder og verksemder som gjev ringverknader for regionen.

Ordførar i Kvam, Torgeir Næss, seier til HF at initiativet er svært velkome.

– Dette har vore etterlyst i Hardanger i mange år, legg han til.

Han vonar såkornfondet kan vera til god hjelp i den elles vanskelege mellomfasen, der gründerar oftast lyt jobba med prosjekt på kveldstid og i helgar for i heile teke å koma framover. I dag er ein ofte i full jobb utanom for å klara seg, fortel han.

Men det skal ikkje investerast på lukke og fromme, seier Næss. Stiftinga vil ha gode vurderingar frå Innovasjon Noreg i botn, som kan gje ein del risikoavklaringar.

– Eg håpar investeringsstiftinga kan føra til at dei som sit med gode idear lettare torer å satsa. Det er ein svær sum.

Til saman 100 millionar kroner er lagde på bordet. I ei tilsvarande ordning, som vert arbeidd med i Bergen kommune, er det snakk om 40 millionar kroner. Moglegheitene er gode, meiner Næss, også for unge gründerar som ynskjer å koma heim, etablera verksemd og lettare få tilgang på oppstartskapital.