I helga er det klart for hagefuglteljing
Fuglevernorganisasjonen Birdlife Norge inviterer til den årlege hagefuglteljinga 25.–26. januar. Du kan bidra i folkeforsking ved å rapportere kva fuglar du har i hagen din.
Det er mykje snakk om at naturmangfaldet forsvinn rundt oss. Gjennom hagefuglteljinga bidreg fuglevenner i heile Noreg til å overvake og dokumentere variasjonar i bestandane av våre vanlegaste fuglar om vinteren. For 18. året på rad skal tusenvis av norske hagar undersøkjast.
Gjennom åra har vi fått god kunnskap om korleis bestandar av fleire artar har endra seg. Nokre fugleartar slit og blir færre, medan andre har ei positiv utvikling og har utvida sitt vinterområde i Noreg, skriv Birdlife i ei pressemelding.
Artikkelen held fram under annonsen.
Nokre artar blir vanlegare. Hagefuglteljinga har vist at artar som spettmeis, kjernebitar, pilfink og stillits har auka den norske vinterutbreiinga si dei siste 15 åra.
Meir bekymringsverdig er dei norske bestandane av grønfink og gulsporv, som har gått tilbake dei siste ti åra. Etter mange år med negative tal som følgje av sjukdom hos grønfinken, kan det rett nok sjå ut til at arten er på veg tilbake. Situasjonen for gulsporv viser dessverre at både den norske hekke- og vinterbestanden stadig er i tilbakegang.
Det blir spennande å sjå kva teljingane viser i 2025, skriv Birdlife.
(©NPK)
