I gang med å heva «Rover»
Måndag skal MS «Rover» løftast opp av fjorden og slepast vekk. Om alt går etter planen.
IMC Diving AS har oppdraget med å fjerna båten. Då HF var på staden måndag morgon, var ei kran allereie på plass og førebuinga i gang. Dykkeleiar i IMC Diving, Torbjørn Fosse, seier to kranbilar til skal på plass. Alt skal plasserast og planleggjast.
– Når alt er på plass, byrjar me å dykka. Då skal me finna ut kvar me kan få løftestroppene under båten, og når me er nøgde med det, kan løftinga byrja, seier Fosse.
Planen høyrest enkel ut, men Fosse seier det ikkje er så lett. For båten ligg på botnen, og stroppene må under båten. For å få det til, må det anten spylast eller gravast hol. Fosse har sett video frå ein undervassdrone. Han fortel at tilgangen frå utsida er god, men at det er verre å koma til inn mot kaien, sidan skroget ligg mot botnen.
Må kanskje nytta plan B
Mellom stroppene og båtkjølen må det liggja noko.
– Mest sannsynleg er det skarpe kantar under båten, så sjølv om stroppene toler høg vekt, kan dei likevel ryka. Ingen veit eksakt kva båten veg. Me kan risikera at ingenting rører seg sjølv om me har fått på alle stroppene, seier Fosse.
Då må plan B aktiverast. Fosse fortel at det inneber å nytta løftesekkar. Desse fungerer som ballongar. Sekkane vert fylte med luft og pressar vatnet ut.
– Problemet er å finna noko å festa dei i, som toler det. Sidan dette er ein litt større båt, er det lettare. For kvar kubikk me klarer å pumpa vekk, vert vekta av båten eitt tonn mindre, seier Fosse.
Då HF var på kaien like før klokka 14 måndag, hoppa dykkarleiar Fosse i sjøen. Han festa den fyrste stroppa. Tre kranbilar bidrog med å få stroppene på rett plass.
Sjå fleire bilete her:
Sjå video frå arbeidet her:
Skal fraktast til Askøy
Om stroppene held, er planen å løfta båten sakte, men sikkert opp. Når ripa er over vatn, kan arbeidet med å pumpa ut vatnet starta.
– Så lenge vatnet ikkje lek inn, tek det maks ein time. Men det er ein grunn til at han ligg på botnen, seier Fosse.
Dersom det er lekkasjar, må desse tettast. Planen er, ifylgje Fosse, å få båten opp og tetta han nok til at han flyt berre ved hjelp av nokre få mindre pumper. Så skal båten slepast til Hanøytangen på Askøy. Slepebåten ligg ved kai i Norheimsund.
Ifylgje tilbodet, som HF har fått innsyn i, er kostnaden med hevinga 412.500 kroner.
Om lag klokka 18.30 måndag kveld vart MS «Rover» slept roleg frå kai og ut frå Norheimsund, med ei handfull vitne på plass på aldn. På veg ut frå bygda fekk han endåtil fylgje av fleire småbåtar.
