— I fjor vart me positivt overraska. Me håpar me vert det i år òg

Kva skal ein planleggja for? Kor mykje energi skal ein bruka? Kor mykje tør ein satsa? Det er ikkje få spørsmål aktørar i reiselivet har stilt seg sjølve gjennom vinteren. Ingen har kunna svara.

— Det vert spanande å sjå korleis det utviklar seg, seier fruktbonde Ola Steinstø.

Steinstø bur på og driv garden ved munningen til Fyksesundet saman med kona Ruth og born. Syster hans, Heidi Helgheim, bur like i nærleiken og driv restauranten «Kjedlaren» og Steinstø Frukt- og Kakebu, som ligg på nedsida av vegen.

Forsiktig opning

Steinstø Frukt- og Kakebu opna forsiktig dørene i helgane i mai, og 7. juni opna dei for fullt. Førebels har det vore lite trafikk forbi, men det er slik det plar vera, ifylgje fruktbonden. Så snart ferien er i gang, brukar det auka på.

— I starten av sesongen er det mest lokale som er innom på torsdagskomler eller sundagsmiddag, men no når morellane vert klare, reknar eg med at det tek seg opp, seier Steinstø.

Det er vêrgudane som bestemmer om det vert ein bra sesong. Vert det dårleg vêr på Vestlandet, er det mange som vel å køyra til andre stader. I fjor torde ikkje Steinstø å håpa på noko, men han vart positivt overraska. Han håpar det same skal skje i år.

Nokre utanlandske turistar vil truleg ta turen, men det kan uansett ikkje samanliknast med slik det har vore tidlegare.

— Tek det piano

Det er ikkje berre pandemi som har prega oppkøyringa til årets sesong. Familien har også vore prega av sjukdom, og det har vore vanskeleg å planleggja.

— Situasjonen gjer at alt har lege på vent. Me har til dømes sagt ifrå oss alle busslastene. Me tek det litt piano, men me held ut, seier Steinstø.

Om det hadde kome bussar i det heile teke, er ei anna sak. Både Steinstø og HF sin utsende har observert éin turistbuss i år. Det var truleg den same bussen.

Opp og ned

Medan fruktsesongen førebels ser bra ut, er det eit elendig jordbærår på garden. Sesongen var over før han var kome i gang. Dette skuldast sjukdommar som har kome dei siste åra, som lever i jorda.

— Me lyt truleg slutta med jordbærproduksjon. Det er synd. Det er ingenting me kan gjera med det, anna enn å flytta heile jordbæråkeren. Det har me ikkje plass til, seier Steinstø.

Plommer og morellar, derimot, veks som aldri før i dei bratte skråningane. Morellane er straks klare for sal, og dei ser skikkeleg bra ut, skal ein tru bonden sjølv. Også plommetrea ber tungt i år.

— Me har aldri hatt så mykje plommer før. Det har vore eit enormt arbeid med tynning av tre. Der me ikkje har tynna, heng dei som drueklasar, seier Steinstø.

Eit rekordår for plommer står i stor kontrast til fjoråret. Då vart det berre seld 240 kilo.

Sugne på sider

Sider er i vinden som aldri før. I Steinstø har det vorte laga sider i generasjonar, men fyrst i fjor fekk turistane kjøpa han med seg heim. I år satsar familien endå meir.

— No har me opna opp for omvising med sidersmaking fem dagar i veka, i samarbeid med Hardangerfjord Adventure AS, fortel Steinstø.

Turane har vore populære og drege til gards både tilreisande og lokale.

— I fjor selde me ut alt me hadde, så i år har me auka produksjonen, seier Steinstø.

No står om lag 2.000 liter klar til servering. Sideren vert berre seld frå garden.