I finalen i «Påskelabyrinten» — igjen

Tysdag denne veka fekk Kleven prøva seg i NRKs Påskelabyrinten. Tordis Sofie frå Nordland mangla dekning på telefonen, så programleiar Viggo Valle valde å gå vidare. Det gav Kleven ein sjanse til å prøva seg. Det enda med ni rette svar og plass i finalen påskeaftan.

Reisa med Viggo Valle starta i Hafrsfjord tysdag og enda i Pisa onsdag føremiddag. Deltakarane seinare i veka kunne ikkje måla seg, og det er kanskje ikkje så rart. Kleven er driven. Tordis Sofie fekk prøva seg igjen langfredag og enda også med finaleplass.

Med for 17 år sidan

Fyrste gongen læraren på Norheimsund skule var med på Påskelabyrinten, var i 2004. Då fall han ut på fyrste reisemålet.

— Hugsar du kvar du skulle reisa den gongen?

— Ja, den gongen skulle eg ha hamna på øya Saint Thomas, som er ein av De amerikanske Jomfruøyer i Det karibiske hav. Far min tipsa om det, men eg misforstod. Eg trudde han meinte Jomfruland, og det kunne jo ikkje stemma, seier Kleven.

Hjelpte vinnaren

I 2019 var han med som medhjelpar til svigersonen, Emil André Erstad. Målet til Erstad var å koma lenger enn svigerfar, og det klarte han. Han gjekk heilt til topps, etter at Kleven hosta opp riktig svar då det galdt som mest.

Svigersonen visste sjølv at Kennedy Space Center ligg på Merritt Island, men programleiar Viggo Valle var då ute etter det meir kjende namnet.

— Hugsar du kva du svara?

— Ja, då skulle dei fram til utskytingsbasen for månerakettane. Cape Canaveral. Det var 50-årsjubileum for månelandinga. Svaret kom heilt i siste liten, fortel Kleven.

Det vert litt googling i konkurransen. Helst med Erstad, svigersonen. Kleven sjølv har ikkje tid til det når han samstundes skal vera på lufta.

— Er det dette som er påske for deg?

— Nei, Påskelabyrinten er berre ein liten del av påska. For meg er det det kristne innhaldet som tel mest, men det er ein morosam ting som eg likar å følgja med på, seier Kleven, som skal ha heimepåske.

Gav reaksjonar

I år er Påskelabyrinten også sendt på TV. Kleven og Erstad har brukt både Google og ei hjelpegruppe på Messenger. Etter sendinga onsdag kom det ein del reaksjonar, blant anna på Twitter, skriv NRK.

Ein av reaksjonane var «Ikkje noko hyggeleg å sjå Påskelabyrinten på TV, for då får ein verkeleg sett korleis folk brukar hjelpemiddel. Knatrar på PC undervegs. Skulle aldri sett på TV, kun radio, mi feil.»

— Dei som seier at ein googlar mens ein held på, skjønar ikkje kor intenst det er å ha Valle på øyra og samstundes resonnera seg rundt spørsmåla han kjem med. Det lèt seg ikkje gjera, seier Erstad til NRK torsdag.

Programleiar Valle avviser påstandane om juks, og seier det er heilt greitt med hjelpemiddel.

— Fyrst av alt går me hardt inn for å laga oppgåver som ikkje lett let seg googla. Elles vert folk oppfordra til å bruka dei hjelpemiddel dei har tilgjengeleg. Det er heilt vanleg å be slekt og vener om hjelp, seier Valle til NRK.

Den direktesende finalen startar klokka 10.05 laurdag.