I fengsel for ulovleg bilkøyring
Ein mann frå Kvam er dømd til 45 dagar fengsel og ei bot på 70.000 kroner etter fleire lovbrot.
Kvemmingen må dessutan venta 18 månader før han får ta førarkortet att. Det kjem fram i ein dom frå Hordaland tingrett.
Mannen vart i mai teken for å ha køyrt bil utan gyldig førarkort, og to månader seinare hende det igjen. Han vart stoppa av politiet då han var på veg til ein fest. Politiet tok ein rustest som viste påverknad. Ein blodprøve som vart teken ein times tid etter at han vart stogga, gav utslag på amfetamin tilsvarande ein promille på 0,5. Bilen hadde heller ikkje gyldige skilt.
I haust sette mannen seg nok ein gong bak rattet – framleis utan førarkort.
Hovudforhandlinga vart halden i slutten av oktober, og mannen erkjende straffskuld for alle postane i tiltalen.
Aktor la ned påstand om fengsel i 45 dagar, ei bot på 70.000 kroner, sperrefrist for å ta førarkort og at mannen måtte dekkja sakskostnader. Forsvararen la ned påstand om at tiltalte skulle vurderast på mildaste måte. Mannen vart ikkje dømd til å betala for sakskostnadene, med bakgrunn i at han erkjende straffskuld både til politiet på staden og i retten.
