I dag aukar barnetrygda for barn over seks år

Frå 1. september får alle med barn over seks år meir i barnetrygd. – Lettar trykket for barnefamiliar, seier finansminister Trygve Slagsvold Vedum.

1. september blir barnetrygda auka med 256 kroner for barn over seks år. Dermed får alle barnefamiliar 1766 kroner i barnetrygd, uavhengig av alderen på barnet.

Det var SV som fekk gjennomslag for dette kravet i forhandlingane med regjeringa om revidert nasjonalbudsjett tidlegare i år.

– Målretta

Finansminister Trygve Slagsvold Vedum (Sp) seier det har vore viktig for regjeringa å løfte barnefamiliane.

– Det er ei heilt målretta styrking av foreldreøkonomien. Når vi gjer dette, vil til dømes ein familie med to barn få over 1400 kroner meir utbetalt kvar månad, skattefritt, enn då vi kom inn i regjeringskontora i 2021, seier han.

Vedum viser til at regjeringa tidlegare i år kutta barnehageprisane til 2000 kroner.

– Det har vore ei målsetjing for oss å gjere grep som lettar trykket for norske barnefamiliar når renta har vore høgare enn ein del la til grunn, og prisveksten ein periode var på veg oppover. No er han på veg nedover, seier finansministeren.

Varslar nye grep

7. oktober legg han fram statsbudsjettet for neste år. Vedum har allereie varsla nye skattelettar for alle med låge og middels inntekter, men har ikkje vilja røpe kor mykje skattane skal kuttast eller kven som får dei største lettane.

Vedum seier regjeringa også vil komme med ei handsrekking til barnefamiliane.

– Vi kjem med nye grep. Då er det ikkje berre snakk om direkte ordningar, men det kan også vere ting vi gjer på skatt eller andre typar grep vi meiner kan hjelpe eller som gjer at folk sit igjen med meir av lønna si.

(©NPK)