Hyttetaket må mokast heile vinteren
Tung snø og skadar etter snøpress kostar norske hytteeigarar og forsikringsselskap mange millionar kroner kvart einaste år. Det beste du kan gjere for å unngå skadar er å moke jamleg.
– Jo meir snøen får liggje og pakke seg hardare og hardare, jo verre er det det for hytta. Og det blir mykje tyngre for deg å kvitte deg med den. Du bør sjekke hytta når snømengda nærmar seg halvmeteren og regelmessig gjennom vinteren, seier Lill Cecilie Bjørndal Klementsen i Frende Forsikring.
Året har starta med store snømengder og utfordringar på Aust- og Sørlandet. Det gjer også at mange hytteområde har fått eit stort påfyll av snø.
Artikkelen held fram under annonsen.
– Mange stader i landet er det nok behov for å moke hyttetaket no. Ta det i helga, viss vêr og føre tillèt det der du er, seier Klementsen.
Kjem det mykje snø, i kombinasjon med vind, blir det ofte skeiv belastning på taka. Då har spesielt eldre uthus og hytter med svak konstruksjon lett for å gi etter.
Dei totale skadetala for 2023 er ikkje klare enno, men dei ni første månadene i år auka talet på skadar på norske hytter med heile 30 prosent, viser tal frå Finans Norge.
(©NPK)
