— Hytter vert selde med ein gong

Han er eigedomsmeklar og dagleg leiar i DNB Eiendom Hardanger. Gjerde opplever god respons på annonsane.

— Ut frå kva eg har sett, er det ingenting som «heng», seier han.

Omsetningstida — tida frå ein eigedom vert lagd ut for sal til han er seld — er forholdsvis kort. Det meste vert selt etter fyrste vising, ifylgje meklaren.

Dei fleste hyttene som er til sals, ligg på Kvamskogen. Prisane har vore stabile dei siste åra. Det har vore ein jamn, venta auke i samsvar med prisstiginga elles.

— Eg hugsar eg hadde ei hytte til sals i januar 2020. Då var det 35 interessentar og fulle visingar, seier Gjerde.

Då var det ikkje påmelding slik det er i dag, og det var fleire nyfikne på vising.

Mest på fjellet

Stort sett er det fjellhytter som vert bygde, og det er generelt dårleg tilgang på hytter ved sjøen, opplyser Gjerde.

Koronapandemien førte til auka interesse. Fleire unngjekk utanlandsferien og ynskte seg hytte.

— Korleis vil gjenopninga av samfunnet påverka hyttemarknaden?

— Det vert spanande. Det er endra reisevanar Kanskje ein kjem attende til normalen att. Kanskje vil fleire selja hytta, seier meklaren.

Gjerde har ikkje inntrykk av at mange hytter i Kvam er selde langt over prisantyding. Salssummen har gjerne lege innan 5—10 prosent av denne.

Dei mest populære hyttene er gjerne litt større, opplyser Gjerde. Og så er det mange såkalla dugnadshytter — små hytter — på Kvamskogen som vert selde.

Hyttene har vorte meir brukte under koronapandemien, til dømes som heimekontor, trur meklaren.

Noko å tenkja på

Fleire ting er viktige å hugsa på om ein skal kjøpa seg hytte, ifylgje Gjerde. Er ho i god stand, eller har ho fukt eller roteskadar? Det er gjerne slikt som skapar størst overraskingar. Vidare bør hytta ha gode og funksjonelle planløysingar, slik at mange kan vera samla. Dinest ville Gjerde ha sett på plasseringa og soltilhøva.

Det er òg viktig at ein kan bruka hytta flittig heile året, så ein ikkje er låst til vintersesongen, til dømes. Det siste er Kvamskogen eit godt eksempel på, der ein kan nytta Norheimsund, Øystese og Hardangerfjorden om sommaren og har tilgang til fint turterreng på skogen.

Nøgd med kjøp

Eirik Lippe Nilsen kjøpte husvære i eit rekkjehus i Eikedalen i Samnanger tidleg på vinteren. I Eikedalen Panorama i Kråvegen er det tre rekkjer med fire husvære i kvar. I tillegg er det om lag tjue frittståande hytter.

Nilsen har sondert hyttemarknaden på Kvamskogen. Den er attraktiv som skidestinasjon nær Bergen, på line med Voss og Myrkdalen. Men det er lite nybygg på Kvamskogen, tykkjer han. Det er mykje eldre og brukt på marknaden. Nilsen var eigentleg ute etter noko med ein nyare standard.

— Og det har de fått no?

— Det har me. Husværa vart bygde i 2008.

Nilsen har kikka etter hytte i eit par år, men det er fyrst det siste halvåret at han verkeleg har vore på jakt etter fritidshusvære og gått på visingar.

Trenden er at det er ein varm marknad.

— Ingen regel utan unntak, sjølvsagt, men det har vore ein del ganske tøffe bodrundar. Nokre tok av litt for tidleg. Mykje vert selt over takst, seier Nilsen.

— Kva trur du er grunnen til det?

— Det har litt med sesongen å gjera, og så var pandemien ei årsak til at mange brukar pengar på fritid i Noreg kontra det å reisa utanlands. Og så er det lite igangsetjing på attraktive tomteområde. Det var ein del som prosjekterte nytt, men det var kanskje ikkje i dei områda ein ynskte det.

— Plass til fleire

— Har du inntrykk av at det er veldig tett med hytter på Kvamskogen?

— Det er ikkje så tett i Eikedalen, der me er. Det er litt tettare innover, men eg sit att med eit inntrykk av at det enno er plass til fleire hytter på Kvamskogen.

Til husværet hans i Eikedalen er det såkalla ski-in-ski-out; ein sklir rett inn i Hardangerløypa, som er del av skianlegget.

Nilsen har kone og to born, og dei gler seg» over å ha fått ein ny stad å vera. Husværet er eit familieprosjekt.

— Er du nøgd med kjøpet?

— Veldig. Me angrar ikkje eit sekund. Eg kunne ynskt at det var litt billegare, men prosessen med meklar og seljar er me svært nøgde med.

Nilsen måtte ut med 3,075 millionar kroner for husværet.