Hyttekøyring ureinar mest

Det går fram av ein rapport om «grønt hytteliv » som Asplan Viak AS leverte i sommar. Rapporten tek føre seg utslepp knytte til bygging og bruk av hytter i Kvam, Voss og Eidfjord.

Rapporten er resultatet av eit samarbeid mellom dei tre kommunane, Bergen kommune og Vestland fylkeskommune. Prosjektet heiter «Grønt hytteliv på Vestlandet». Målet er å kartleggja klimafotavtrykket frå utbygging og bruk av hytter i Eidfjord, Kvam og Voss, og setja i verk tiltak for å få ned klimagassutsleppa.

Harde fakta

Eidfjord, Kvam og Voss er store hyttekommunar med til saman over 7600 fritidsbustader. Totalt er klimafotavtrykket frå bruken av eksisterande fritidsbustader i dei tre kommunane stipulert til over 21.000 tonn CO₂-ekvivalentar (karbondioksidekvivalentar, red. merknad) årleg.

Til samanlikning er dei direkte klimagassutsleppa i Eidfjord, Kvam og Voss om lag 140.000 tonn CO₂-ekvivalentar årleg, sett bort frå utslepp frå industri, olje og gass.

Energibruk står for 20 prosent av utsleppa frå eksisterande hytter. Andre utslepp er knytte til vedlikehald av bygg og veg, og desse er stipulert til å vera kring 5 prosent.

Kvamskogen snillast i klassen

Det gjennomsnittlege klimafotavtrykket per hytte per år varierer mellom hytteområda. Kvamskogen har minst fotavtrykk, med om lag 1,6 tonn CO₂-ekvivalentar i året per fritidsbustad, medan Sysendalen, Myrkdalen, Bavallen og Tråstølen har over 3 tonn CO₂-ekvivalentar i året per fritidsbustad.

Asplan Viak påpeikar at tiltaka som har størst effekt på klimagassutsleppa, er dei som kan bidra til at det vert bygt færre hytter. Ein restriktiv praksis for regulering av nye fritidsbustader vil vera naudsynt for å få dette til. Også større grad av deling av hytta med andre og meir bruk av eksisterande fritidsbustader vil bidra positivt.

Det nest beste ein kan gjera, er å byggja om eller oppgradera eksisterande hytter i staden for å byggja nye.

Varsam arealbruk

Dersom det likevel skal byggjast heilt nye fritidsbustader, må det gjerast med minst mogleg utslepp, påpeikar Asplan Viak. Spesielt vil ein del tiltak knytte til transport, som å fortetta rundt kollektivknutepunkt, kunna gje god klimaeffekt. Når slik fortetting ikkje er mogleg, vil det vera viktig at kvar hytte har ein varsam arealbruk.

Å byggja såkalla «off-grid» hytter utan tilkomeveg og straum, vatn og avløp, og å byggja på pålar framfor betongsole, er viktige tiltak for å få til det, skriv Asplan Viak.

Det er utarbeidd eit sett med tiltak, basert på klimagassutrekningar. Tiltaka er mellom anna vurderte ut frå effekt, kor lette dei er å gjennomføra og kva dei kostar for kommunane. Tiltaka er presenterte og diskuterte i ein arbeidsverkstad med deltakarar frå alle kommunane.

Arbeidet med rapporten er finansiert med midlar frå Klimasats-ordninga til Miljødirektoratet og eigeninnsats frå kommunane.