Hytte vert monaleg dyrare
Kostnaden med den nye beredskapshytta til Øystese Røde Kors i Hamlagrø kan verta vel 8,2 millionar kroner.
Det går fram av eit oppdatert kostnadsoverslag som organisasjonen sende til fylkeskommunen i november. Summen inkluderer moms.
Ei viktig årsak til kostnadsauken er stigande prisar. Ifylgje overslaget reknar Øystese Røde Kors med ein auke på vel 1,2 millionar kroner pluss moms, som fylgje av prisauken det siste året og fram til planlagd byggjestart til våren.
Ifylgje skrivet var det i november samla inn kring 2,6 millionar kroner i stønad til prosjektet. I mai søkte Øystese Røde Kors fylkeskommunen om tre millionar kroner i stønad, men søknaden er enno ikkje handsama.
Leiar Andreas Jacobsen opplyser at det har vore mykje att og fram i samband med handsaminga. Han har fått opplyst at årsaka er at søknaden kan få stønad frå fleire postar. Den siste meldinga han har fått, er at saka skal handsamast i januar. Dersom søkjaren får full pott, kan ein byrja planleggja for bygging i år, sjølv om det framleis vil mangla ein del pengar, fortel leiaren.
Den eksisterande hytta, Dyrbu, er i dårleg stand og ikkje lenger tenleg for aktivitetane til eigaren. Mellom anna er snøskutergarasje og innandørs toalett med i planane for det nye bygget.
Øystese Røde Kors har inngått intensjonsavtalar med både Kvam vidaregåande skule og Framnes Kristne Vidaregåande Skule. Dei ynskjer å nytta hytta til ymse skulefaglege aktivitetar. I tillegg vonar tiltakshavaren å bruka hytta til både integreringstiltak og til aktivitetar i Barnas Røde Kors.
Les også:
