Hytte seld for 2,4 millionar kroner meir enn prisantyding

Eigedomen som vart seld måndag, vert nok hugsa lenge hjå den ferske bedrifta.

— Engasjementet rundt sjøeigedomar og småbruk brukar å vera stort, men dette gjekk over all forventning, seier Kjetil Aarsand, eigedomsmeklar og styreleiar i Hardanger Eigedomsmekling.

Fritidseigedomen i Fyksesundet vekte større interesse enn dei kunne førestilla seg, både meklar, takstmann og seljar. I salsannonsen vart hytta skildra som ein flott sjøeigedom med ei hytte som er godt teken vare på og halden ved like. Det fall i smak hjå fleire.

Det var rundt 80 på lista over interessentar, og mellom 20 og 30 personar på visning. I bodrunden var det åtte personar som var med. Prisen var sett til 2,8 millionar kroner, og enda 2,4 millionar kroner over det igjen, på 5,2 millionar kroner.

— Det er ein typisk eigedom som er vanskeleg å setja verdi på. Me hadde venta god interesse, men ikkje i nærleiken av dette, seier Aarsand.

Kva som er grunnen til at akkurat denne eigedomen klarte å skilja seg ut, er uvisst. I juni vart det selt tre sjøeigedomar til mellom tre og fire millionar kroner. Alle tre var større eigedomar med fleire soverom.

— Hytta verka godt teken vare på og låg heilt i sjøkanten. Det trur eg har vore utslagsgjevande faktorar, seier Aarsand.

Blant dei interesserte var det fleire tyskarar, nokre frå England, austlendingar, bergensarar og lokale. Aarsand er forsiktig med å seia for mykje om kjøparen, men kan fortelja at eigedomen enda med ein utanlandsk kjøpar.

— Det skal bli godt å sleppa det konstante jaget