Hylling for hundre
Jubilanten Lidarende fekk æra og gleda av å hysa moro, musikk og melankoli på eige 100-årsgilde.
Om eit hus kan ha kjensler, er uvisst. Tårene gjorde storstova nær Skiftesgjelet seg kanskje ferdig med då vatnet for nokre år sidan strøymde frå lekkasjane i taket. Laurdag heldt det tett, trass i at både regnet og vyrdnaden fløymde.
Eit hundretal gjester hadde sessa seg til jubileumsgilde kring borda i forsamlingshuset kloss i fylkesveg 49. Dei skulle feira at eit heilt sekel er unnagjort sidan huset for innbuarane på strekninga Vikøy–Vangdal vart reist av ungdomslaget Samhald i 1924.
Sidan har Lidarende gjeve tak over hovudet til alt frå minnestunder, bingo og dåpsfestar til dansekurs, småbarnstreff og slåstkampar. Kanskje har kimen til eit barn, eller like snart kimen til eit skilsmål, oppstått i ein mørk krok? På godt og vondt har huset ført sambygdingane nærare einannan i hundre år.
«Eg elskar ungdomshus» er tittelen på hyllinga journalist Brit Aksnes – oppvaksen på Aksnes – forfatta i Dag og Tid i 2023. Ho gjekk til hennar barne- og ungdomsårs største samlingsstad i nærmiljøet. I det programleiar Helge Hammersland omtala som den seriøse delen av jubileumsfesten, las Aksnes heile teksten. Tårer varsla den lettrørte skribenten tidleg, men dei kom fyrst heilt på tampen.
Per Røberg og Tom Tyssebotn kallar mest på dei leande tårene. Revyveteranane har hovudrolla i jubileumsfilmen «Hol i takjet», som hadde premiere på festen. I beste Blues Brothers-stil set dei seg føre å samla inn pengar til det som var eit reelt problem, nemleg taklekkasjar. På veg til det naudsynte stempelet frå fylkesordføraren møter dei fleire lokale heltar som med varierande hell og vilje hjelper dei. Både skodespelarar og filmskapar Magnus Hisdal i Hardangerfjord Media AS fekk stor applaus etter visinga.
– Det sit så mange minne i veggene her. Dette huset har vore med og prega meg og mange andre som sit her – korleis me har vorte i dag, rett og slett. Eg har slite ut mange sko her. Og eg hugsar det meste. Gratulerer med 100 år, Lidarende! Du held deg jaggu godt, sa programleiar Hammersland.
Også varaordførar Frode Nygård, som helsa på vegner av Kvam herad, tok verkemiddelet besjeling i bruk. Han slo fast at eit forsamlingshus kan ha eit krevjande liv, med mellom anna austavind, lite kveldssol og varierande omsut frå bygda som utfordringar.
– Han ser bra ut, han skrik ikkje etter vedlikehald, og han husar svært mange nøgde og blide menneske. Kan ein hundreåring ha det betre? Nei, sa Nygård, som håpar hundreåringen kan gå laus på hundre nye år.
– Eg trur han tenkjer at han er i gode hender med den forsamlinga og stemninga som fyller han i kveld, sa Nygård.
Det siste som hende før HF forlét samkoma, var den tradisjonelle allsongen av «Tytebæret oppå tuva» før den kortreiste hjortegryta kom på bordet. Etter måltidet skulle dei fremste borda bort for å gje plass til rytmiske rørsler til musikk.
Sjå fleire bilete frå festkvelden her:
