– Høyrer ikkje saman
Båtferdsle utan alkohol er viktig, understrekar folkehelsekoordinator Reidun Braut Kjosås i ei pressemelding.
Båtmiljøet i Kvam er stort, og om sommaren vert det verkeleg liv. Trass sol og god stemning, skal ein vera litt varsam når ein leikar med dei naturlege elementa. Alkohol er ein faktor som aukar risikoen monaleg på sjøen.
Ei undersøking Ipsos har utført på vegner av Av-og-til, viser at dei to siste åra har ein av ti i Kvam sete på med ein fritidsbåt der båtføraren har drukke alkohol.
– Som passasjer vel du ikkje om kapteinen skal drikka eller ikkje, men du vel sjølv om du vil sitja på, seier Kjosås, som er lokal Av-og-til-koordinator i Kvam herad.
Alkohol fører til utvida reaksjonstid, dårlegare oppfatningsevne og redusert dømekraft, koordinasjon og balanse. Dersom ein dett over bord, vert kroppen raskare nedkjølt og er mindre i stand til å berga seg sjølv.
– Båtførarar må hugsa på at dei har eit stort ansvar når dei har passasjerar om bord, minner Braut Kjosås om.
Promillegrensa for kapteinar på fartøy under 15 meter er 0,8. Regelen gjeld ikkje passasjerar, men oppmodinga er likevel å halda seg edru.
– Me har ingen å mista på sjøen i sommar, seier Kjosås.
