Hotellforvandling er godt i gang i Strandebarm

Bak ombygginga står Strandebarm View AS, eigt av bergensarane Steinar Knapskog og Rune Svendsen. Sjølv om dei kjøpte hotellet allereie i 2014, er det først denne hausten alle dei naudsynte løyva er komne på plass, fortel Knapskog.

Slår saman rom

Strandebarm hotell har to fløyer – ei som ligg mot vegen og ei som ligg mot elva. Leilegheitene skal byggjast i fløya mot elva. Fløya inneheld 16 rom fordelte på to høgder, og desse skal slåast saman til åtte leilegheiter. Leilegheitene vert om lag 60 kvadratmeter store og skal ha to soverom. Kvar leilegheit får ei bu og eit lite uteareal. Det vert også ført opp terrassar på sørsida av fløya. Inngangen til leilegheitene vert gjennom ein overbygd svalgang på nordsida, fortel Knapskog. Strandebarm View skal laga parkeringsareal på jordet på sørsida av hotellet. Kvar leilegheit skal få to parkeringsplassar. Dessutan skal bebuarane ha eit lite, felles uteareal i det som i dag er hotellhage.Då HF vitja hotellet fredag 19. oktober, var mykje av grovarbeidet allereie gjort. To og to rom var slått saman, og Knapskog fortel at leilegheitene har fått nytt elektrisk anlegg, nytt røyrsystem og ny isolering. Vidare skal det skiftast tak og vindaugo i bygget, terrassar og svalgang skal byggjast, og fasaden på heile hotellbygget skal få ei ansiktsløfting.

Kostar seks millionar

Strandebarm View kjøpte hotellet for 3,1 millionar kroner. Knapskog seier at verksemda truleg kjem til å bruka vel seks millionar på å gjera hotellromma om til leilegheiter.Kva som skjer med den fløya som ligg mot vegen, er usikkert. Strandebarm View ønskte å byggja leilegheiter også der. Det lèt seg ikkje gjera av di Fylkesmannen protesterte. Etter mekling mellom Kvam herad og Fylkesmannen enda ein på ei løysing der det vert bygd fritidsbustader i ei fløy, medan den andre må nyttast til næring.– Fløya mot vegen overtek eg sjølv med firmaet mitt. Eg er ikkje sikker på kva me skal bruka den til, men truleg vert det selskapslokale eller noko liknande. Bygget er gamalt og slite, og det vil kosta å pussa det opp. Ein må driva godt om ein skal rettferdiggjera investeringa. Det vert ikkje så lett i Strandebarm, seier Knapskog.Når leilegheitene er klare, er førebels ikkje klart.– Me har ikkje hastverk og tek arbeidet i eit naturleg tempo. Om det ikkje vert for kaldt i vinter, trur eg mykje vil verta gjort dei neste månadene, seier han.

Så langt er ingen av leilegheitene selde, men Knapskog seier han har vore i kontakt med interesserte kjøparar. Prisen på leilegheitene vil verta om lag 2,5 millionar kroner.