Hotellet fekk ikkje bygga i strandsona. Då ringde ordføraren sjefen sjølv.

Hotellet Hardanger House i Jondal har jobba i lang tid for å få utvida.

Eigar Conrad Hansen vil bygga nytt «kulturhus», forma som ein isbrearm på Akkjerhaugen. Det skal innehalde nye hotellrom, konferansesenter og restaurant.

Tidlegare i år sende kommunestyret reguleringsplanen på høyring.

Men overordna styresmakter sette ein stoppar for planane:

• Statsforvaltaren i Vestland meiner at planen ikkje tek tilstrekkeleg omsyn til strandsona, og fryktar at den private utbygginga vil avgrensa tilgangen for allmenta.

• Vestland fylkeskommune meiner at byggetiltaka ikkje er godt nok tilpassa landskapet og kulturminne på Akkjerhaugen, deriblant ei freda vikinggrav.

• Noregs vassdrags- og energidirektorat meiner at faren for kvikkleireskred ikkje er godt nok dokumentert.

Ullensvang kommune er likevel framleis positiv.

– Dette kan vere eit smykke Jondal fortener, sa ordførar Roald Aga Haug (Ap) tidlegare i år.

Gjekk til topps

Kommunen har derfor i haust bede om eit meklingsmøte med Statsforvaltaren og Vestland fylkeskommune, for å prøva å komma til semje i saka.

Men allereie i juni inviterte Aga Haug statsforvaltaren sjølv, Liv Signe Navarsete, til å komma for å sjå på området og høyra om planane til hotelleigar Conrad Hansen.

12. juni tok Navarsete ein sjeldan tur åleine for å setta seg inn i saka.

Navarsete fortel at det ikkje er ofte at ho får høve til å takka ja til slike møteinvitasjonar.

– Men eg skulle uansett frå Oslo til Bergen akkurat den dagen. Så då bestemte eg meg for å køyre over Haukeli, og delta på møtet på vegen. Eg hadde ikkje brukt ein heil arbeidsdag på å reisa frå Bergen elles. Det har eg som regel ikkje kapasitet til.

Navarsete deltok åleine på synfaringa, seier ho. Ingen sakshandsamarar eller andre fagfolk var til stades.

– Det er av same grunn. Me har ekstremt mange saker, og ikkje så mange sakshandsamarar. Me har difor ikkje kapasitet til å kunna bruka ein heil arbeidsdag på å reisa ut til enkeltsaker.

Det er likevel ikkje ei ulempe at ho var åleine, meiner Navarsete.

– Det er viktig at Statsforvaltaren kjem seg ut, kan ha ein god dialog med ordførarane og ha ein direkte samtale med dei det gjeld.

– Embetet skal vurdere saka ut frå fleire interesser, som miljø og strandsone. Som statsforvaltar er det min jobb å vekta faglege vurderingar mot samfunnsinteressene og heilskapen i sakene, seier ho.

Kor mange slike møte i plan- og byggesaker ho har delteke på, har ho ikkje tal på, seier Navarsete.

– Det blir når det måtte høva slik.

Forskjellsbehandling?

Som statsforvaltar har Navarsete moglegheit til å overprøva sakshandsamarar.

– Då er det vel ein ganske stor fordel for tiltakshavaren å kunna møta deg og presentera sitt syn til deg personleg i forkant, slik hotelleigaren fekk i dette tilfellet?

– Eg gjer ikkje om vedtak utan vidare. I den grad eg gjer det, er det basert på diskusjon.

Det er svært få saker der ein ikkje er samd internt hjå Statsforvaltaren, legg Navarsete til.

– Blei de einige på møtet om noko som måtte endrast i reguleringsplanen for at Statsforvaltaren skulle trekka motsegna?

– Nei, sjølvsagt ikkje. Dette er ein prosess, og me har eit regelverk å følga.

Navarsete legg til at statsforvaltarane i landet har fått tydeleg beskjed frå regjeringa om å skilje mellom «pressområde» og distrikt som har utfordringar knytte til næringslivsutvikling og busetnad.

– Det skal vere lettare å få dispensasjon til å bygga i strandsona i for eksempel Jondal enn i Bergen, seier ho.

– Du seier at du sjeldan får delteke på slike møte. Blir det ikkje då forskjellsbehandling å velja seg ut enkelte å delta på?

– Nei, eg meiner ikkje det. Det at eg var til stades, legg ikkje føringar for kva Statsforvaltaren som embete gjer i saka. Men ideelt sett skulle eg gjerne ha kunna delta på mange fleire slike møte, seier Navarsete.

– Du seier at det at du deltok på møtet ikkje legg noko føringar for saka, men om det er sant, hadde vel ikkje kommunen sett noko poeng i å invitera deg?

– Eg går ikkje inn i konkrete drøftingar av planar dersom me ikkje har dialogmøte. Eg lyttar til argumenta og tek dei med i totalvurderinga som skal gjerast, svarar Navarsete.

– Ikkje spesielt fint no

Ordførar Roald Aga Haug beskriv møtet som ei «uforpliktande synfaring».

– Me meiner det er viktig å leggja til rette for initiativ til næringsutvikling i kommunen, og derfor vil me realisera reguleringsplanen i Jondal. Me meinte at Liv Signe Navarsete burde komma og sjå området sjølv, seier han.

Aga Haug meiner at området har mykje potensial som ikkje blir nytta for augneblinken.

– Det er jo ikkje spesielt fint no. Det står ein gammal verkstad der og forfell òg. Det er ikkje akkurat så allment tilgjengeleg slik det står no heller.

Ordføraren understrekar at det viktig at dei offentlege områda blir betre og tilgjengelege for allmenta.

– Er ikkje som i Bærum

Hotelleigar Conrad Hansen seier at det aldri har vore hans intensjon å halda folk vekke frå området.

– Eg er ikkje som folka i Bærum som bygger gjerde ned til sjøen. Eg bygger ikkje dette for å halda folk ute. Det skal vere tilgjengeleg for alle, seier Hansen.

Søknadsprosessen har allereie vore ein lang prosess, seier han. Og ikkje minst dyr.

– Eg har snart brukt éin million kroner på reguleringsplanen.

No har han bestilt ny skredrapport for området, som han håpar vil imøtekoma motsegna til NVE. Deretter vil han sjå på motsegna til Statsforvaltaren og fylkeskommunen.

Hansen trur det framleis vil ta nokre år å få løyve til å byggeplanane sine – om han nokon gong får det.