Hotell vil visa seg meir fram

Hotelldirektør Tanja Borge vonar hotellet i Øystese kan vera eit utstillingsvindauga for regionen, ifylgje søknaden til Kvam herad.

— Å vera «på» i sosiale medium og det å kunna visa til freistande bilete av aktivitetar langs fjorden og i fjella, med god informasjon attåt, er naudsynt for å få folk til å koma til hotellet og til Kvam, skriv hotellet.

Planen er å oppdatera heimesida og auka kunnskapen om drift og utnytta sosiale medium. Kompetanse og kurs må hentast eksternt. Hotellet har ein eigen ansvarleg for sosiale medium. Vona er ein auke i trafikken på heimesida på 50 prosent.

Budsjettet for satsinga er på 950.000 kroner, så hotellet vil yta 150.000 kroner sjølv.